Oklend Texnologiya Universitetinin Yeni Zelandiyadan olan alimləri müəyyən ediblər ki, ofis dedi-qoduları iş yerində həm dost, həm də düşmən tapmağa kömək edə bilər. 

Sfera.az xəbər verir ki, sözügedən araşdırma "The Conversation" elmi portalında dərc olunub.

Müəlliflər qeyd ediblər ki, həmkarları otaqda yox ikən onları müzakirə etməyi sevən insanlar adətən tənqid edilib qınansalar da, bu qeybət fərqli nəticələri də ortaya qoyur.

Mütəxəssislər qeybətin üç əsas aspektini müəyyən ediblər: xidmət, reputasiya və qiymətləndirmə.

Birincisi, bu cür söhbətləri vacib və ya maraqlı məlumat mübadiləsi xidməti hesab edir.

İkincisi, sözügedən şəxsin reputasiyası ilə bağlıdır.

Üçüncüsü isə qeybətin öz hədəfi haqqında müsbət və ya mənfi məlumat ötürdüyünü müəyyən edir.

Tədqiqatçılar yazılı testlərdən və sonrakı müsahibələrdən istifadə edərək kommersiya şirkətlərinin bir sıra əməkdaşları arasında sorğu keçiriblər. Nəticələrin də göstərdiyi kimi, şayiələrin qavranılmasında bu şayiələri yayan şəxsin niyyətlərinin təfsiri həlledici rol oynayır.

Sadə dillə desək, şayiələri alan şəxs qarşı tərəfin motivlərinin səmimi və etibarlı olduğuna inanırsa, bu, yeni dostluqlar qurmaq və ya köhnə dostluqları canlandırmaq şansı verir. Əksinə, qeybətçinin motivləri eqoist görünürsə, bu, çox güman ki, komandada ona olan münasibəti korlayır.

Həmçinin məlum olub ki, dedi-qoduların məzmununu müsbət və ya mənfi kimi qiymətləndirmək onun nəticəsinə daha az təsir göstərir. Bu o deməkdir ki, əgər həmsöhbət həmkarı haqqında neqativ, lakin vacib məlumatları (məsələn, onun pis xasiyyəti və davranışı haqqında) səmimi şəkildə danışırsa, bu ona etibarı artırır.

İnci