Analitik Maykl Klark "Sky News"a bildirib ki, ABŞ-nin Yaxın Şərqdəki bazaları İranla əlaqədar yüksək hazırlıq vəziyyətinə gətirilib. "Regiondakı ABŞ bazalarında olan 40 mindən çox hərbçi qarşıdakı həftələrdə baş verə biləcək hücum və cavab tədbirlərinə hazırdır" , - o qeyd edib. Onun sözlərinə görə, ABŞ SEPAH-a qarşı kiberhücum və "Starlink" terminallarının İrana daxil olması kimi alternativ əməliyyat variantlarını da nəzərdən keçirir.

Mövzu ilə bağlı Sfera.az-a danışan siyasi şərhçi Kənan Novruzov bildirib ki, son zamanlar ABŞ və İsrailin İrana hərbi müdaxilə ehtimalı gündəmə gəlib.

Onun sözlərinə görə, həm İran daxilində baş verənlər, həm də gözlənilən xarici təsir fonunda ABŞ və digər Qərb dövlətləri İrandakı vətəndaşlarına ölkəni tərk etmək barədə çağırış ediblər:

"Adətən belə çağırışlar boş yerə olmur və konkret arqumentlərə, o cümlədən kəşfiyyat məlumatlarına əsaslanır. ABŞ nüvə dosyesi ilə bağlı İranla konsensus əldə edə bilmədi. İndiyədək Vaşinqtonun İran rejimi ilə bağlı tərəddüdünün əsas səbəbi məhz davam edən müzakirələr idi. Lakin danışıqlar nəticə vermədi. Belə olan halda prinsip etibarı ilə ABŞ-nin İrana hərbi müdaxiləsi üçün əngəl yoxdur. Doğrudur, belə bir müdaxilə Vaşinqton üçün "A" variantı deyil. Çünki ABŞ lideri Donald Tramp hələ hakimiyyətə gəlməzdən əvvəl dünyadakı müharibələrə son qoyacağını deyir, özünü “sülh prezidenti” kimi təqdim edirdi. ABŞ-nin Venesuelaya hərbi müdaxiləsi, Qrenlandiyaya iddiasından sonra İranda da güc tətbiqi Trampın nüfuzuna ciddi təsir edə bilər. İkincisi, ABŞ hakimiyyəti sərt gücdən daha çox yumşaq təzyiq metodlarına üstünlük verir. Bu baxımdan, Vaşinqton, yəqin ki, əvvəlcə iqtisadi təzyiq metodlarını, həmçinin İranı daxildən dağıtmağı sınayacaq”.

K.Novruzov qeyd edib ki, ABŞ-nin İrana müdaxiləsi daxildəki aksiyaların təbii gedişinə mane ola bilər:

“Belə bir ssenari İsrailin əlinə oynamaq deməkdir. ABŞ isə İsraillə məsafəli davranır və yəqin ki, Təl-Əvivin maraqlarına xidmət edəcək addım atmaq üçün tələsmir. Bununla belə, ABŞ-nin İrana hərbi müdaxilə ehtimalı gündəmdədir. Əgər Vaşinqton yeganə variantının belə bir əməliyyat olduğundan əmin olsa, yəqin ki, tərəddüd etməyəcək”.

Firuzə Əliyeva
Sfera.az

Hərbi bazalar hazırlıq vəziyyətindədir - Vaşinqtondan əmr gözlənilir