“Rabitəbank” 2026-cı ilin ilk üç ayını 5,1 milyon manat xalis mənfəətlə başa vurub. Mənfəət illik müqayisədə 0,4 milyon manat və ya 9,4% artıb.

Sfera.az bankın hesabatına istinadən xəbər verir ki, artıma baxmayaraq xərclərin sürətli yüksəlişi diqqət çəkir.

Bankın əsas təzyiq nöqtələrindən biri faiz xərcləri olub. Faiz xərcləri 18,3 milyon manata çataraq illik müqayisədə 56,8% artıb. Bu artımın əsas səbəbi depozitlər üzrə faiz ödənişlərinin 78,9% yüksələrək 14,0 milyon manata çatmasıdır ki, bu da bankın resurs bazasının əhəmiyyətli dərəcədə bahalaşdığını göstərir.

Eyni zamanda qeyri-faiz xərcləri də artaraq 24,7 milyon manata yüksəlib (9,5% artım). Xərclərin həm faiz, həm də qeyri-faiz istiqamətində paralel artması bankın gəlirliliyinə əlavə təzyiq yaradır və əməliyyat effektivliyinin zəiflədiyini göstərir.

Risklər tərəfində də mənzərə pisləşir. Vaxtı keçmiş kreditlər 35,5 milyon manata çataraq illik müqayisədə 7,8% artıb. Problemli kreditlərin böyük hissəsinin ticarət sektorunda və Bakı regionunda cəmləşməsi portfelin diversifikasiya baxımından risklərini artırır. Bu tendensiya gələcəkdə əlavə ehtiyatların yaradılması zərurətini doğura bilər.

Öhdəliklərdə artım və bahalı resurs riski

Bankın ümumi öhdəlikləri 1,26 milyard manata çatıb. Artım əsasən maliyyə institutları qarşısında öhdəliklərin 344,4 milyon manata yüksəlməsi ilə bağlıdır. Bu isə bankın daha çox borclanma hesabına böyüdüyünü və potensial olaraq daha bahalı resurslara yönəldiyini göstərir.

Digər tərəfdən, hüquqi şəxslərin depozitlərinin 3,2% azalaraq 213,4 milyon manata düşməsi bank üçün əlavə siqnaldır. Korporativ depozit bazasının zəifləməsi daha sabit və ucuz maliyyə mənbələrinin daraldığını göstərə bilər ki, bu da gələcəkdə likvidlik və maliyyələşmə xərcləri baxımından risk yaradır.

Ümumilikdə isə, “Rabitəbank” xalis mənfəətini artırmağa nail olub. Lakin faiz xərclərinin kəskin artımı, borclanma yükünün genişlənməsi və problemli kreditlərin yüksəlməsi bankın maliyyə dayanıqlığına təzyiq yaradır./qaynarinfo

“Rabitəbank”ın xərcləri sürətlə artır