“Rusiya tərəfindən pomidor və Azərbaycanın digər kənd təsərrüfatı məhsullarının idxalına qadağa qoyulması çağırışları çox yersizdir”.

Sfera.az xəbər verir ki, bunu iqtisadçı-ekspert Eldəniz Əmirov öz sosial şəbəkə hesabında yazıb. Onun sözlərinə görə, iki ölkə arasında qarşılıqlı ticarət dövriyyəsindəki artımın demək olar ki, hamısı Rusiyanın Azərbaycana ixracı hesabına baş verib:

“Bu ilin ilk 5 ayında qarşılıqlı ticarət dövriyyəsinin hər 5 dollarlıq hissəsinin 4 dolları Rusiyanın Azərbaycana ixracıdır. Ötən il də qarşılıqlı ticarət bu nisbətdə olub. Azərbaycanın ixracında aqrar məhsulların payı elə də yüksək deyil. Ötən il 3,4 milyard dollarlıq qeyri-neft ixracında aqrar məhsulların payı 790 milyon dollar təşkil edib. Aqrar və aqrar-sənaye məhsullarının birgə ixracı 1,1 milyard dollara bərabər olub. Bu, ölkənin ümumi ixracında çox cüzi payı təşkil edir. Rusiya Azərbaycandan aqrar və aqrar sənaye məhsullarının idxalını dayandırsa, bu, dövlət üçün böyük bir itki olmayacaq. Əgər Azərbaycan aqrar ixrac bazarının itirilməsi, yaxud Rusiyanın haqsız iddialarına boyun əyilməsi seçimi qarşısında qalacaqsa, əlbəttə, öz dövlət suverenliyini seçəcək. Bu gün dünyada olan 200 dövlətdən neçəsi Rusiyaya ümid olub ayaqda qalır? Rusiya olmadan ölkələr ixrac bazarı tapa bilməyəcək?”

Mütəxəssis qeyd edib ki, aqrar ixracatçıların yeni bazarlar tapması çətin, amma mümkün olan işdir:

“Burada həm sahibkarların, həm də dövlət qurumlarının aktivliyi söhbət mövzusudur. İxrac bazarları arasında Şərqi Avropa, Körfəz ölkələri və Mərkəzi Asiya var. Pilot proqramlar çərçivəsində hər 3 coğrafiyaya çıxa, tədricən bazar payımızı genişləndirə bilərik. Bu gün Avropaya ixracda əsas məqam qoyulan keyfiyyət tələbləridir. Biz həmin tələblərə uyğunlaşmaq üçün addımlar atmaqla bu baryeri ortamüddətli dövrdə aşa bilərik. Sahibkar prosesə 2-3 illik planda biznes marağından baxır, dövlət isə uzunmüddətli və strateji baxır. Buna görə də yalnız kəmiyyətin deyil, keyfiyyətin artırılmasını hədəfləyən addımlar atılmalıdır”.

“Dövlət tərəfindən qeyri-neft ixracının dəstəklənməsi üçün əlavə mexanizmlər işə salına bilər. Məsələn, qeyri-Rusiya istiqamətli aqrar ixrac üçün konkret dəstək mexanizmləri yaratmaq olar. Biz əvvəl-axır bunu etməli, qeyri-neft ixracımızın bazarını diversifikasiya etməliyik”,-E.Əmirov əlavə edib.

Firuzə Əliyeva

Sfera.az