Yaxın Şərqdə baş verən gərginliklər yenidən dünya enerji bazarlarında dalğalanmalara səbəb olub. İsrail ilə İran arasında artan hərbi qarşıdurmalar, neftin birjalardakı qiymətini kəskin şəkildə artırıb.

Bu vəziyyət Azərbaycanın da daxil olduğu enerji ixracatçısı ölkələrin iqtisadi mənzərəsində birbaşa əks olunub. Belə ki, Azərbaycan neftinin qalxdığını da müşahidə edirik.

Belə ki, son olaraq dünya bazarında "Azeri Light" markalı Azərbaycan neftinin 1 barelinin qiyməti 3,41 ABŞ dolları, yaxud 4,3 % artaraq 82,58 ABŞ dolları təşkil edib.

Maraqlıdır, neftin bahalaşması tendensiyası davam edəcəkmi?

Bununla bağlı Sfera.az-a açıqlama verən iqtisadçı-ekspert Natiq Cəfərli hazırkı gərginliyin fonunda hərbi toqquşmalar və geosiyasi qeyri-sabitlik səbəbilə neftin qiymətində müəyyən artımın müşahidə olunduğunu bildirib.

Onun sözlərinə görə, bu artımın davamlı olub-olmaması isə münaqişənin müddətindən və gedişatından asılıdır:

“Əgər qarşıdurma uzunmüddətli xarakter alarsa, qarşılıqlı zərbələr intensivləşərsə və region ölkələri də dolayısı ilə müharibəyə cəlb olunarsa yaxud ərazilərində hərbi əməliyyatlar aparılarsa biz istəməsək də, neftin qiyməti 100 ABŞ dollarını keçə bilər. Lakin hər şey münaqişənin nə vaxt və hansı şərtlərlə başa çatacağından asılıdır.

Əgər yaxın günlərdə hər hansı diplomatik razılaşma əldə olunarsa, bu zaman enerji bazarlarında sabitlik bərpa oluna və qiymətlərdə yenidən enmə müşahidə edilə bilər. Çünki neftin qiymətindəki bu yüksəlişin arxasında fundamental iqtisadi faktorlar dayanmayıb. Artım sırf geosiyasi risklərlə bağlıdır”.

Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb. Azərbaycanda neft əsasən "Azəri-Çıraq-Günəşli” (AÇG) yataqlar blokunun işlənməsi haqqında müqavilə çərçivəsində hasil edilir. Müqavilədə Azərbaycan Dövlət Neft Şirkətinin (SOCAR) payı 31,65 %-dir.

Fidan Hacızadə

Sfera.az

Azərbaycan nefti bahalaşmaqda davam edəcək? - AÇIQLAMA