"Çin üçün 80 faiz kifayətdir" - ABŞ prezidenti
ABŞ Prezidenti Donald Tramp sosial media hesabından Çinə tətbiq ediləcək yeni idxal rüsumları ilə bağlı açıqlamalar verib.
Sfera.az xəbər verir ki, Tramp Çinə idxal rüsumunun 80 faizə endirilməsini məqbul hesab edib.
Bununla belə dövlət başçısı deyib ki, Çinlə bağlı tariflər ABŞ-nin maliyyə naziri Skott Bessentdən asılıdır.
Birləşmiş Ştatlar və Çin bir-birlərinə tətbiq etdikləri son yüksək tariflər səbəbindən artan ticarət gərginliyini azaltmaq üçün bu həftə sonu İsveçrədə yüksək səviyyəli danışıqlara başlayacaqlar.
Bu, ABŞ prezidenti Donald Trampın aprel ayında Çin mallarına 145 faizlik gömrük rüsumları tətbiq etməsindən sonra iki ölkə arasında ilk rəsmi üz-üzə təmas olacaq.
ABŞ nümayəndə heyətinə maliyyə naziri Skott Bessent və ticarət nümayəndəsi Ceymison Qri, Çin tərəfini isə baş nazirin iqtisadi məsələlər üzrə köməkçisi He Lifenq rəhbərlik edəcək.
Danışıqların əsas gündəmi hər iki tərəfə tətbiq edilən yüksək gömrük tariflərinin azaldılması və ticarət əlaqələrinin yenidən balanslaşdırılması olacaq.
Çin Xarici İşlər Nazirliyi danışıqların ABŞ-ın tələbi ilə baş tutacağını bildirərək, Vaşinqtonun konkret və ədalətli təkliflər verməli olduğunu vurğulayıb.
Vasif
Sfera.az
