Son 3 ildə əhalinin kredit borcu iki dəfə artıb - Rəqəmlər
2021-ci ildən sonra əhalinin kredit borcu 2 dəfədən çox artıb.
Sfera.az Mərkəzi Bankın statistik məlumatlarına istinadən xəbər verir ki, 2021-ci ilin sonunda 8,6 milyard manat olan kredit borcu 2025-ci ilin martın sonunda 17,642 milyard manata çatıb.
Müqayisə göstərir ki, təxminən 3 il ərzində əhali banklar və qeyri-bank kredit təşkilatları qarşısında daha 9 milyard manat borclanıblar. Bununla da əhalinin kredit borcu 2,05 dəfə artıb.
Bu artım sürəti olduqca yüksəkdir. Belə ki, Azərbaycanda bütün subyektlərin kredit borcu son 3 ildə 1,73 dəfə, əhalinin borcundakı artımı çıxdıqda isə digər sahələrdə borclanmadakı artım sürəti 1,41 dəfə olub.
Müqayisədən göründüyü kimi, əhalinin kredit borclarındakı artım sürəti digər sahələrə nisbətən 45 faiz yüksəkdir.
Ümumilikdə, bütün subyektlərin kredit borcu 12 milyard manat artıb ki, bunun da 9 milyardı əhalinin borclarındakı artımından ibarətdir. Son məlumata əsasən, cəmi borcların 59,4 faizi əhaliyə məxsusdur. Halbuki, 2021-ci ilin sonunda bu göstərici 50 faiz idi.
Vasif
