Qızıl nə qədər bahalaşacaq?

ABŞ elan etdiyi tarifləri dayandırıb Çinə daha yüksək tariflər tətbiq etdikdən sonra qızılın qiyməti sürətlə artmağa başlayıb. Məlumatlara görə, Çində yığım məqsədilə qızıl alışı artıb. Artıq qızılın bir qramının qiyməti 100 dolları ötüb. Qeyd edək ki, Çinin böyük həcmdə rezervləri var. 

Çin qızıl alışını artırarsa, qızılın qiyməti hansı həddə qədər yüksələ bilər?

Mövzu ilə bağlı Sfera.az-a açıqlama verən iqtisadçı-ekspert Xalid Kərimli bildirib ki, ümumiyyətlə 2025-ci ildə qızılın qiymətinin qalxacağına dair proqnozlar var. 

Ekspert qeyd edib ki, hazırkı qiymət səviyyələri rekord sayılır. Qızılın qiyməti son illərdə iki dəfə artıb. Hələ yüksək qiymətlərdə qalacağı gözlənilir. 

Onun sözlərinə görə, qızılın daha da bahalaşacağı proqnozlaşdırılır:

“Bir unsiya qızılın qiyməti hətta 3500 dollara qədər artma ehtimalının olduğu gözlənilir. Burada əsas nüanslar qeyri müəyyənlik, ticari müharibələr, hərbi münaqişələr, hərbi müharibələrdir. Yenə də bütün bunlar hamısı proqnozlardır. Bu proqnozlara prezidentlərin, iqtisadiyyat nazirlərinin, mərkəzi bankların qərarları, inflyasiyanın həcmi təsir edir. Real vəziyyəti təbii ki, biz ilin sonunda biləcəyik, amma ümumi şəkildə bir bəlli olan məsələ odur ki, qızıl qiymətləri 2025-ci ildə də yüksək olacaq”.

Firuzə Əliyeva