"Apple" öz yerini "Microsoft"a verdi
“Apple” son dörd ticarət sessiyasında səhmləri 23% ucuzlaşdıqdan sonra "dünyanın ən dəyərli şirkəti" statusundan düşüb və birinci yeri “Microsoft”a verib.
Sfera.az xəbər verir ki, bu barədə CNBC telekanalı məlumat yayıb.
Telekanalın məlumatına görə, çərşənbə axşamına olan məlumata görə, “Microsoft”un dəyəri 2,64 trilyon dollar, “Apple”ın bazar kapitallaşması isə 2,59 trilyon dollar təşkil edib.
Qeyd edilib ki, ABŞ Prezidenti Donald Tramp idxal olunan məhsullara rüsum tətbiq etməzdən əvvəl hər bir şirkətin kapitallaşması 3 trilyon dolları ötmüşdü. Çin ilə sıx ticarət əlaqələri sayəsində "Apple" sektordakı digər Amerika şirkətlərindən daha çox ABŞ hökumətinin tarif siyasətindən təsirlənir.
İsveçrənin "UBS" bankının analitiklərinin fikrincə, ABŞ-də "iPhone 16 Pro Max"ın qiyməti tariflərə görə 350 dollar arta bilər.
Yahoo Finance xidmətinin məlumatına görə, Nasdaq elektron birjasında hərracların bağlanışında səhmlərinin qiyməti hər səhm üçün 172,42 dollar təşkil edib. Əvvəlki ticarət sessiyası ilə müqayisədə şirkət səhmlərinin dəyərində 4,98% ucuzlaşma yaşanıb.
Xatırladaq ki, aprelin 2-də Tramp 185 ölkə və ərazinin məhsullarına gömrük rüsumunun tətbiq ediləcəyini bəyan edib. Universal 10%-lik tariflər aprelin 5-dən, fərdi tariflər isə aprelin 9-dan qüvvəyə minib.
Firuzə Əliyeva
