Vergi ödəyicilərinin sayı 800 mini keçdi - RƏQƏMLƏR

"Ən son məlumata görə 2025-ci ilin 1 aprel tarixinə aktiv vergi ödəyicilərinin sayı ilin əvvəlindən bəri 0,3% artaraq 809,2 minə çatıb. Bu faiz ifadəsində böyük artım olmasa da, sözügedən statistika üzrə stabilliyin tam qorunması kimi qiymətləndirilə bilər".

Sfera.az xəbər verir ki, bunu iqtisadçı-ekspert Eldəniz Əmirov deyib. Onun sözlərinə görə, əsas maraqlı məqam ƏDV ödəyicilərinin sayının daha ciddi artmasıdır.

Ekspert qeyd edib ki, bu artım həmin tarixə 2,9 faiz olub:

“Belə ki, hazırda 54,4 min aktiv ƏDV ödəyicisinin olduğu bildirilir. Riyazi hesablasaq, deməli, bu tarixə təxminən 1500 yeni ƏDV ödəyicisi yaranıb. Göründüyü kimi ƏDV ödəyicilərinin artım tempi ümumi sahibkarların artım tempindən daha yüksəkdir. Adətən ƏDV ödəyicilərinin sayının artım tempinin, ümumi sahibkarın sayının artım tempindən yüksək olması 3 səbəbdən baş verir.

Birincisi, ən sadə haldır - böyüyən bizneslər yeni yarananları üstələyir. İkincisi, şəffaflaşma prosesi gücləndirilməsi nəticəsində göstəricilərin yüksəlir. Üçüncüsü isə nə dövriyyə artır, nə şəffaflıq. Sadəcə vergi məcəlləsində edilən dəyişikliklər nəticəsində dünən ƏDV ödəyicisi olmayan sahibkar, bu gün ƏDV ödəyicisi olur".

Firuzə Əliyeva