"Meta" şirkəti süni intellekt sahəsindəki mövqeyini gücləndirərək "Llama 4" adını verdiyi yeni və inkişaf etmiş model ailəsini təqdim edib. "Llama 4 Scout", "Llama 4 Maverick" və inkişaf mərhələsində olan "Llama 4 Behemoth" modelləri süni intellekt dünyasında yeni bir dövrün başlanğıcı kimi göstərilib.

Sfera.az xəbər verir ki, bu yeni modellər, vizual anlayış və müxtəlif vəzifələrdəki üstün məhsuldarlığı ilə diqqət çəkir. Çinli süni intellekt laboratoriyası "DeepSeek"dən ilham alınaraq inkişaf etdirilən "Llama 4" modelləri, süni intellekt sahəsində yeni bir rəqabət mühiti yaradacaq.

"Llama 4 Scout" modeli sənəd xülasəsi və böyük kod bazaları üzərində düşünmə kimi vəzifələri həyata keçirir. O, 10 milyon "token"a qədər çıxa bilən böyük kontekst pəncərəsi ilə diqqət çəkir.

"Llama 4 Maverick" kodlaşdırma, məntiqi düşünmə, çoxdillilik, uzun kontekst və şəkil müqayisələri kimi sahələrdə iddialı olan bu modeldir. O, "OpenAI"ın GPT-4o və "Google"un "Gemini 2.0" kimi modellərini geridə qoymağı hədəfləyir.

"Llama 4 Behemoth" modeli 288 milyard aktiv parametr və təxminən iki trilyon parametr ilə ən güclü "Llama 4" modeli olaraq önə çıxır. O, riyaziyyat problemlərini həll etmə kimi STEM yönümlü vəzifələri həyata keçirir.

"Llama 4 Scout" və "Maverick" modelləri artıq "Llama.com"da və "Meta"nın iş ortaqları vasitəsilə istifadəyə verilib. Lakin "Llama 4 Behemoth" modeli hələ də inkişaf mərhələsindədir. Avropa İttifaqında yaşayan istifadəçilər və şirkətlər, süni intellekt və məlumat gizliliyi qanunlarına görə bu modelləri əldə edə bilmirlər. Həmçinin, aylıq aktiv istifadəçi sayı 700 milyondan çox olan şirkətlərin "Meta"dan xüsusi lisenziya alması tələb olunur.

Bəsti Rəfizadə

"Meta"dan yenilik - "Llama 4"ü təqdim etdi