Çin ABŞ-yə yeni sanksiyaları elan etdi
ABŞ-nin Çin məhsullarına qarşı tətbiq etdiyi 34%-lik gömrük vergisi artımına cavab olaraq, Çin hökuməti Amerika şirkətlərinə qarşı yeni sanksiyalar elan edib.
Sfera.az xarici mediaya istinadən xəbər verir ki, Çin Ticarət Nazirliyinin açıqlamasına görə, ümumilikdə 27 ABŞ şirkəti ixrac nəzarəti və qadağalar siyahısına daxil edilib. Onlardan 16-sı hərbi və mülki ikili istifadə üçün nəzərdə tutulan məhsulların ixracına qadağa gətirilən şirkətlərdir. Digər 11 şirkət isə “etibarsız qurumlar” siyahısına salınıb.
Nazirlik bildirib ki, bu addım Çinin milli təhlükəsizliyi və maraqlarını qorumaq, həmçinin silahların yayılmasının qarşısının alınması üzrə beynəlxalq öhdəliklərə əməl etmək məqsədilə atılıb.
Sanksiyaya məruz qalan şirkətlər arasında müdafiə sənayesi, aviasiya, pilotsuz uçuş aparatları istehsalı, kəşfiyyat və logistika sahəsində fəaliyyət göstərən qurumlar yer alır. Bu şirkətlərin Çinlə həyata keçirdiyi ixrac əməliyyatları bundan sonra ciddi nəzarətə alınacaq.
Xüsusilə, “Skydio” və “BRINC Drones” kimi pilotsuz uçan aparat istehsalçıları da daxil olmaqla 11 şirkətin, Çinlə suverenlik mübahisəsi olan Tayvanla texnologiya sahəsində əməkdaşlıq etdiyi üçün “etibarsız qurum” siyahısına salındığı qeyd olunub.
Fidan Hacızadə
