ABŞ-nin Prezidenti Donald Trampın yeni tarif siyasəti texnologiya nəhəngi olan "Apple"nin məhsullarının qiymətinə ciddi təsir göstərə bilər. Yeni tarif tənzimləmələrinə əsasən, ABŞ-yə idxal olunacaq mallara əlavə 10% vergi tətbiq ediləcək. "Apple"ın əsas istehsal bazaları olan Çin və Vyetnam kimi ölkələrə tariflər 54%-ə qədər yüksəlir.

Sfera.az xəbər verir ki, mütəxəssislər bildiriblər ki, bu qərar "Apple" məhsullarının maya dəyərinin artmasına səbəb olacaq və nəticədə qiymət artımı qaçılmaz olacaq.

Şirkət son illərdə istehsal prosesini Çindən Vyetnam və Hindistan kimi ölkələrə keçirməyə çalışsa da, həmin ölkələr də yüksək vergi ilə üzləşəcək. Belə ki, Vyetnam mallarına qarşı vergilər 46%, Hindistana qarşı 26%, Malayziyaya qarşı isə 24%-ə qaldırılıb.

Xüsusilə "iPhone" modellərinin böyük hissəsinin Çində istehsal olunduğu nəzərə alındıqda, bu dəyişikliklərin ABŞ-də satış qiymətlərinə birbaşa təsir edəcəyi gözlənilir. Yeni vergi qərarlarının açıqlanmasının ardından "Apple"ın səhm dəyərində 7% azalma qeydə alınıb. Bu, investorların vəziyyətdən narahat olduğunu göstərir. İstehlakçılar isə mümkün qiymət artımlarının şəxsi büdcələrinə mənfi təsir edəcəyindən narahatdırlar.

"Apple"ın qarşıdakı dövrdə bu vəziyyətə hansı strategiya ilə cavab verəcəyi və qiymət siyasətini necə formalaşdıracağı maraqla gözlənilir.

Yeni vergi qərarlarının Azərbaycanda "Apple" məhsullarının qiymətlərinə necə təsir edəcəyi isə hələlik məlum deyil. Lakin qlobal bazarda baş verəcək istənilən qiymət artımının Azərbaycan da daxil olmaqla digər ölkələrə də sirayət etməsi ehtimal olunur.

Bəsti Rəfizadə

"Apple" məhsullarında qiymət artımı gözlənilir