Pensiya kapitalları indeksləşdiriləcək - Faiz dərəcəsi BƏLLİ OLDU
Azərbaycanda sığortaolunanların fərdi şəxsi hesabının sığorta hissəsində qeydə alınan pensiya kapitalı indeksləşdirilərək 2,2 faiz artırılacaq.
Sfera.az bildirir ki, “Əmək pensiyaları haqqında” Qanuna əsasən ildə bir dəfə istehlak qiymətləri indeksinin illik səviyyəsinə uyğun olaraq pensiya kapitalları indeksləşdirilir.
Dövlət Statistika Komitəsinin açıqladığı məlumata əsasən, 2024-cü ildə istehlak qiymətləri indeksi 2023-cü ilə nisbətən 2,2 faiz yüksəlib. Qanunvericiliyə uyğun olaraq 2025-ci ildən bütün pensiya kapitalları 2,2 faiz artırılacaq.
Qeyd edək ki, pensiya kapitalının məbləği yaşa görə pensiya çıxmaq üçün əsas iki göstəricidən biridir. Hazırda 40 320 manat və daha çox kapitala sahib olan şəxslər yaşa görə pensiyaya çıxa bilir. 2025-ci ilin fevralından tələb olunan minimum pensiya kapitalının məbləği 46 080 manata çatdırılacaq.
Toplanan pensiya kapitallarının məbləğinin artırılmasına məhz inflyasiya göstəricisi də təsir edir.
Vasif
Sfera.az
