Uzunmüddətli əmanətlər sürətlə ARTIR - SƏBƏB

Azərbaycanda uzun müddətə qoyulan əmanətlər üzrə faiz gəlirlərinin vergidən azad edilməsi uzunmüddətli əmanətlərin həcminin sürətlə artmasına səbəb olub.

Sfera.az xatırladır ki, uzun müddətə yerləşdirilən əmanətlər 2024-cü ilin yanvarın 1-dən sonra vergidən azad edilib.

Yeni qaydalara asasən, manatla 18 ay və daha uzun müddətə banka yerləşdirilən əmanətlərin faiz gəlirindən vergi alınmır. Vergi güzəştinin tətbiqindən sonra uzunmüddətli əmanətlərin həcmi sürətlə artır. 2024-cü ilin yanvar-may ayları ərzində bütün əmanətlər 5,64 faiz artdığı halda, uzunmüddətli əmanətlərin həcmi 30 faizə yaxın artıb.

2023-cü ilin sonunda banklarda 12,948 milyard manat həcmində əmanət var idi. 2024-cü ilin iyulun 1-də əmanətlərin həcmi 13,68 milyard manata çatıb. Beş ay ərzində əmanətlərdə 730 milyon manat artım qeydə alınıb. Bu artımın tamamı məhz uzunmüddətli əmanətlər hesabına baş verib. İlk 5 ayda uzunmüddətli əmanətlər 752 milyon manat artaraq 3,338 milyard manata çatıb.

Qeyd edək ki, 18 ay və daha uzun müddətə qoyulan əmanətlərə görə banklar yüksək faiz ödəməklə yanaşı, faiz gəlirlərindən vergi də alınmır. Qısa müddətə qoyulan əmanətlərdə isə əksinə, həm faizlər aşağıdır, həm də faizlərdən 10 faiz vergi tutulur. Bu səbəbdən son aylarda qısamüddətli əmanətlərin həcmində artım qeydə alınmayıb.

Vasif