“Elmi yeniliklər əsasən universitetlərdə və elmi tədqiqat institutlarında baş verməlidir. Elm və Təhsil Nazirliyi bizim yerimizə elmlə məşğul olmalı deyil”.

Sfera.az xəbər verir ki, bu fikirləri Azərbaycan Neft və Sənaye Universitetinin rektoru Rüfət Əzizov İctimai TV-nin “Diqqət Mərkəzi” verilişində səsləndirib.

O bildirib ki, ölkədəki elmi-tədqiqat institutları vaxtilə mövcud olan iqtisadi ehtiyaclara uyğun yaradılıb. Onların bəziləri müxtəlif binalarda yerləşsələr belə, bir-birinə çox oxşar fəaliyyət göstərir, bəzən eyni işləri təkrar edirlər:

“Məhz buna görə də optimallaşdırma prosesinə gedildi: yaxın sahələr üzrə fəaliyyət göstərən institutların birləşdirilməsi, orada çalışan kadrların fəaliyyətinə yenidən baxılması zərurəti yarandı. Çünki ümumi mənzərəyə baxdıqda göründü ki, bəzi institutlarda kifayət qədər elmi məhsuldarlıq yoxdur, beynəlxalq əməkdaşlıq sahəsində də gözləntiləri ödəmək baxımından problemlər mövcuddur. Düşünürəm ki, bu institutların universitetlərlə əlaqələndirilməsi və inteqrasiyası onların inkişafına ciddi töhfə verəcək. Bu, hazırda müşahidə etdiyimiz elmi inkişafla bağlı birinci əsas komponentdir. İkinci mühüm məqam isə ondan ibarətdir ki, son dövrlərdə elmin inkişafında formalizmdən, yalnız hesabat xatirinə elmlə məşğul olmaqdan nəticə əsaslı dəyərləndirməyə keçid edilir. Bu, çox vacib addımdır. Nədir nəticə əsaslı dəyərləndirmə? Cənab Prezident də müsahibəsində qeyd etdi ki, hansı tədqiqatlar aparılır, həmin tədqiqatlar hansı jurnallarda dərc olunur, harada indekslənir və s. Bu, faktiki olaraq bu gün əlimizdə olan əsas alətdir ki, ölkə üzrə elmin həcmini və keyfiyyətinin hansı səviyyədə olduğunu müəyyən edə bilək”.

Rüfət Əzizov əlavə olaraq vurğulayıb ki, bir alimə düşən məqalə sayı, “Scopus” kimi beynəlxalq elmi bazalarda həmin məqalələrə edilən istinadların sayı, beynəlxalq həmmüəllifliklə yazılan məqalələrin ümumi məqalə sayına nisbəti, eləcə də məqalələrə olan istinadlar - bütün bunlar ölçülə bilən meyarlardır:

"Ümumiyyətlə, biz nəyisə ölçə biliriksə, deməli, onu müəyyən qədər düzəldə və inkişaf etdirə də bilərik”.

Nazirlik bizim yerimizə elmlə məşğul olmalı deyil - Rektor