Bir həftəyə 25 milyona yaxın baxış yığdı
“Netflix”də yayımlanan “Adolescence” serialı bir həftə ərzində 25 milyona yaxın izləyici kütləsi toplayıb.
Sfera.az xəbər verir ki, bu barədə “Netflix”in son bir həftədə ən çox baxılan serialları ilə bağlı reytinq açıqlamasında qeyd olunub.
Belə ki, martın 10-16-sı arasında ən çox baxılan seriallar siyahısında “Adolescence” ilk yerdə olub. Serial birinci həftədə 24 milyon 300 min baxış toplayıb və 93 milyon saat izlənilib.
Martın 13-dən yayımlanan serial ümumilikdə 4 bölümdən ibarətdir. Cek Torne və Stefan Qrehamın rejissorluğu ilə çəkilmiş “Adolescence” kriminal dram janrındadır. Serial həm mövzusu, həm də çəkiliş texnikası ilə sosial mediada diqqət mərkəzindədir.
“Adolescence” serialı sinif yoldaşını öldürməkdə ittiham olunan 13 yaşlı oğlandan bəhs edir. Gənc qızın qatilini axtaran polis onun sinif yoldaşı Cemini ona 7 bıçaq zərbəsi vuraraq öldürməkdə şübhəli bilərək nəzarətə götürür. Heç kim inanmaq istəməsə də, bütün ipucları bu uşağa işarə edir. Həm polis, həm də terapevtlər Cemiyə eyni sualları verməlidirlər.
Serialda cinayət və günahsızlıq arasındakı incə xətt mükəmməl şəkildə çatdırılmaqla yanaşı, həmçinin nəsillər arasındakı fərq də ortaya qoyulur.
Qeyd edək ki, reytinq cədvəlində növbəti yerdə 6 milyon baxış sayı ilə “Running Point”, üçüncü yerdə isə 4 milyon 400 min baxışla “Zero Day” gəlir. Sıralamada dördüncü yerdə isə 3 milyon 900 min baxışa baxmayaraq 49 milyon 200 min saat izlənilən “Beauty in Black”dir.
