Son illərdə dünyanın müxtəlif yerlərində meşə yanğınlarının sayında artım müşahidə edilir. Qlobal istiləşmə və anomal hava şəraiti ilə yanaşı insan fəaliyyəti nəticəsində də meşələr yanır və nəticədə minlərlə hektar meşə sahəsi məhv olur.

Azərbaycanda da meşələrdə yanğınlar qeydə alınır. Lakin ölkəmizdə bu sahədə olan yanğınlar digər ölkələrlə müqayisədə azdır.

Sfera.az-ın sorğusuna cavab olaraq Fövqəladə Hallar Nazirliyindən verilən məlumata əsasən, 2024-cü ildə Azərbaycanda cəmi 1 meşə yanğını qeydə alınıb.

Bundan başqa, 2025-ci ilin ötən dövrü ərzində meşə və təbiət ərazilərinə yaxın sahələrdə ümumilikdə 83 yanğın hadisəsi baş verib. Bu yanğınlardan 15-i sonradan meşə torpaqlarına, 2-si isə xüsusi mühafizə olunan təbiət ərazilərinə keçib.

FHN-nin məlumatına əasən, Azərbaycanda yanğınların sayı az olmaqla yanaşı onların genişlənməsinə dair faktlar da yoxdur. Bunun əsas səbəbi yağın baş verdikdən sonra ona vaxtında müdaxilə edilməsi və yanğın ərazisinin lokallaşdırılmasıdır.

Son 10 ilin statistikası da göstərir ki, Azərbaycanda meşə yanğınları çox deyil.

Dövlət Statistika Komitəsinin açıqladığı məlumatlara əsasən, 2015-ci ildə 3 yanğın, 2016-cı illərdə 2 yanğın hadisəsi qeydə alınıb.
Ən çox yanğın 2022-ci ildə müşahidə edilib – 66 hadisə. Həmin ildə yanğınların əhatə etdiyi sahə də rekord həddə çatıb – 869,2 hektar.
Lakin növbəti ildə bu göstəricilər kəskin şəkildə azalıb. 2023-cü ildə 36 yanğın baş verib və cəmi 25,3 hektar sahə yanıb.

Yanğınların baş verdiyi ərazilərin xüsusiyyətləri də maraqlıdır. Məsələn, 2022-ci ildə dağlıq və dağətəyi sahələrdə 808,4 hektar, düzənlik sahələrdə isə 60,8 hektar ərazi yanıb. 2023-cü ildə bu göstəricilər müvafiq olaraq 9,6 və 15,7 hektara qədər azalıb.

Əlavə edək ki, Azərbaycanda meşə yanğınlarının az olmasının əsas səbəblərindən biri ölkəmizdə meşə sahəsinin kiçik olmasıdır. Hazırda ölkə ərazisinin cəmi 11-12 faizi meşəlik sahələrlə əhatə olunub.

Bununla yanaşı, Fövqəladə Hallar Nazirliyi və aidiyyəti dövlət qurumları tərəfindən görülən profilaktik tədbirlər, erkən xəbərdarlıq sistemlərinin tətbiqi, eləcə də əhalinin maarifləndirilməsi meşə yanğınlarının minimuma endirilməsində mühüm rol oynayır.

Firuzə Əliyeva
Sfera.az

Azərbaycanda ötən il cəmi bir meşə yanğını olub - EKSKLÜZİV