Qadınları qarət edənlər SAXLANILDI
Sumqayıtda qadına kömək etmək adı ilə yaxınlaşıb soyğunçuluq edən şəxs saxlanılıb.
Bu barədə Sfera.az-a Daxili İşlər Nazirliyindən məlumat verilib.
Qeyd olunub ki, hadisə yanvarın 7-si saat 18 radələrində baş verib:
“Belə ki, naməlum şəxs şəhər sakini olan 63 yaşlı qadına kömək etmək adı altında yaxınlaşıb, ona zor tətbiq edib və 30 manat pulunu, mobil telefonunu əlindən alıb. Sumqayıt Şəhər Polis İdarəsinin 1-ci Polis Bölməsinin əməkdaşlarının həyata keçirdikləri əməliyyat tədbirləri nəticəsində hadisəni törətmiş 38 yaşlı Abbas Həsənov saxlanılıb. Araşdırma zamanı onun daha bir nəfərə qarşı dələduzluq edərək mobil telefonunu əlindən alması da müəyyən olunub”.
Qurum həmçinin sözügedən şəhərdə müəyyən olunan digər faktlarla bağlı məlumat da verib: “Sumqayıt polisinin həyata keçirdiyi daha bir əməliyyat zamanı evlərin birindən 1200 manat dəyərində təmir alətləri, inşaat materialları, eləcə də şəhər ərazisində yerləşən ticarət mərkəzlərinin birində qadının gödəkcəsindən 7320 manat oğurlayan əvvəllər məhkum olunmuş şəxslər - Əvəz Cəfərov və Sürəyya Balayeva da müəyyən olunaraq saxlanılıblar. Faktlarla bağlı araşdırmalar davam etdirilir”.
Günay
