1 May Beynəlxalq Əmək Günüdür

1 May dünyada Beynəlxalq Əmək Günü kimi qeyd olunur. Əmək hüquqlarının müdafiəsi və işçilərin həmrəyliyini simvolizə edən bu əlamətdar gün müxtəlif ölkələrdə rəsmi tədbirlərlə, yürüşlərlə və ictimai aksiyalarla qeyd edilir. Zəhmətkeşlərin hüquqları uğrunda uzunmüddətli mübarizənin nəticəsi kimi tarixə düşən bu gün, təkcə keçmişin deyil, həm də bu günün və gələcəyin sosial ədalət çağırışlarını əks etdirir.

Sfera.az xəbər verir ki, Beynəlxalq Əmək Günü ilk dəfə 1889-cu ildə II İnternasional tərəfindən rəsmiləşdirilib və 1890-cı ildən etibarən dünya ölkələrində qeyd olunmağa başlanıb.

Bu günün əsası 1886-cı ilin 1 mayında ABŞ-nin Çikaqo şəhərində keçirilmiş kütləvi etiraz aksiyaları ilə qoyulub. Minlərlə işçi gündə 8 saatlıq iş rejiminin tətbiqi tələbilə küçələrə çıxaraq, bu istiqamətdə tarixə düşən mühüm bir mərhələnin əsasını qoyublar. Həmin dövrdə bir çox işçi həbslərə və təzyiqlərə məruz qalsa da, onların səyləri nəticəsində qlobal işçi hərəkatı formalaşmağa başladı.

Müasir dövrdə 1 May yalnız tarixə hörmət deyil, həm də əmək hüquqlarının qorunması, ədalətli əmək şəraiti və layiqli həyat tərzi üçün çağırış günüdür. Bu gün həm də işsizliyin azaldılması, qeyri-formal məşğulluğun qarşısının alınması və işçi təhlükəsizliyinin təmin olunması məsələlərinin diqqət mərkəzinə çəkildiyi bir platforma rolunu oynayır.

Azərbaycanda da əmək münasibətlərinin tənzimlənməsi və əmək hüquqlarının qorunması dövlət siyasətinin prioritet sahələrindəndir. Son illərdə ölkədə əmək bazarının inkişafı, qeyri-formal məşğulluğun leqallaşdırılması, sosial müdafiə sisteminin təkmilləşdirilməsi istiqamətində mühüm addımlar atılıb. Eyni zamanda, əmək müqavilələrinin elektron sistem vasitəsilə rəsmiləşdirilməsi, minimum əməkhaqqının artırılması və sosial paketlərin genişləndirilməsi bu sahədə aparılan islahatların əsas nümunələrindəndir.

Azərbaycanda 1 May günü rəsmi qeyri-iş günü olmasa da, müxtəlif təşkilat və qurumlar tərəfindən əməkdaşların fəaliyyətinə diqqət göstərilir, onlara təşəkkür tədbirləri keçirilir, həmçinin bu gün mediada və ictimai platformalarda geniş şəkildə qeyd olunur.

Bəsti Rəfizadə
Sfera.az