Azərbaycanın işğaldan azad olunan ərazilərində mina təhlükəsi hələ də ciddi problem olaraq qalır. Mina partlayışları nəticəsində hər il onlarla insan həlak olur və ya xəsarət alır. Minatəmizləmə prosesində iştirak edən əməkdaşlar da bu təhlükəli şəraitdə fəaliyyət göstərirlər.

Mövzu ilə bağlı Sfera.az-a açıqlama verən hərbi ekspert Emin Həsənli bildirib ki, dövlət mina təmizləmə sahəsində sistemli və genişmiqyaslı işlər həyata keçirir:

“Əraziləri minalardan təmizləmək üçün Azərbaycan Prezidenti tərəfindən Minatəmizləmə Agentliyi (ANAMA) yaradılıb və agentliyə kifayət qədər vəsait ayrılıb. Müdafiə Nazirliyi nəzdində iki mühəndis-istehkam briqadası yaradılıb. Daha sonra Fövqəladə Hallar Nazirliyi və Dövlət Sərhəd Xidməti də bu işə cəlb olunub. Bu istiqamətdə ciddi və faydalı işlər görülür və proseslər təhlükəsizlik qaydalarına uyğun həyata keçirilir”.

Ekspertin sözlərinə görə, mina sahələrinə yaxınlıqda olan hərbçilər və mülki şəxslər maksimum diqqətli olmalı, mina təmizləmə ilə birbaşa əlaqəsi olmayan şəxslər bu ərazilərdən uzaq durmalıdır:

“Mülki vəziyyətdə olan hərbi işçilər və mina ilə əlaqəsi olmayan şəxslər bu ərazilərdən uzaq olmalıdır. Hazırda müasir texnologiyalardan istifadə edilir və hələ tam təmizlənməmiş sahələr mərhələli şəkildə yoxlanılır”.

E.Həsənli qeyd edib ki, Qarabağ bölgəsi mina təhlükəsi baxımından dünyanın ən problemli ərazilərindən biri sayılır:

“Qarabağ dünya üzrə ən çox minalanmış ərazilərdən biridir. Təkcə Ağdam və Füzuli rayonlarında ermənilərin təqdim etdiyi xəritələrə əsasən 97 min mina mövcuddur. Lakin məlum oldu ki, bu xəritələrin yalnız 25 faizi doğrudur, qalan hissəsi isə yanlışdır. Bu, düşmənin azərbaycanlıların bölgəyə geri dönüşünü əngəlləmək niyyətini bir daha sübut edir”.

Ekspertin sözlərinə görə, 2020-ci ildən bu günə qədər mina partlayışları nəticəsində 392 nəfər həlak olub:

“Təəssüf ki, bu vaxta qədər mina partlayışları nəticəsində 392 nəfər həyatını itirib. Bu, problemin miqyasını və faciəvi nəticələrini göstərir. Beynəlxalq ictimaiyyət bu məsələyə daha ciddi yanaşmalı və Ermənistanın mina terroruna qarşı konkret mövqe nümayiş etdirməlidir”.

Mina təhlükəsi təkcə insanların həyatını deyil, həm də işğaldan azad olunmuş ərazilərin bərpasını və məcburi köçkünlərin təhlükəsiz qayıdışını ləngidir. Buna görə də mina təmizləmə prosesi təkcə hərbi deyil, həm də sosial və humanitar məsələ kimi qiymətləndirilir.

Bəsti Rəfizadə

"Dünyada ən çox minalanmış ərazilərdən biri Qarabağdır" - Ekspert