Prezidentin işdən çıxardığı NAZİR MÜAVİNİ KİMDİR - DOSYE
Xəbər verdiyimiz kimi, müdafiə sənayesi nazirinin müavini Yəhya Musayev tutduğu vəzifədən azad olunub. Bu barədə Azərbaycan Prezidenti İlham Əliyev sərəncam imzalayıb.
Sfera.az Yəhya Musayevin dosyesini təqdim edir:
Musayev Yəhya Musa oğlu 1959-cu ildə Bakıda anadan olub.
O, 1983-cü ildə D. Bünyadzadə adına Azərbaycan Xalq Təsərrüfatı İnstitutunu bitirib.
Yəhya Musayev 1979–1980-ci illərdə fəhlə işləyib, 1980–1982-ci illərdə "Azneftyoltikintitəmir" trestində mühəndis və iqtisadçı, 1982–1983-cü illərdə 26 Bakı komissarı adına Neftqazçıxarma İdarəsinin Tikinti Quraşdırma İdarəsində, 1983–1985-ci illərdə 26 Bakı komissarı adına Neftqazçıxarma İdarəsində, 1985–1994-cü illərdə Ə. C. Əmirov adına Neftqazçıxarma İdarəsində, 1994–2003-cü illərdə isə Azərbaycan Respublikası Dövlət Neft Şirkətinin Quruda Neft və Qazçıxarma İstehsalat Birliyində baş mühasib vəzifəsində çalışıb.
2003–2004-cü illərdə Azərbaycan Respublikası Dövlət Neft Şirkətinin "Azneft" İstehsalat Birliyində İqtisadiyyat-maliyyə və mühasibat uçotu idarəsinin rəisi olub.
2004–2006-cı illərdə Azərbaycan Respublikası Dövlət Neft Şirkətinin "Azneft" İstehsalat Birliyində baş direktorun müşaviri vəzifəsində çalışıb.
O, 2006-cı ildən, Müdafiə Sənayesi Nazirliyi yarandığı dövrdən nazir müavini vəzifəsini tuturdu.
Xatırladaq ki, Prezident İlham Əliyevin ötən il noyabrın 18-də imzaladığı Sərəncam ilə Vüqar Valeh oğlu Mustafayev müdafiə sənayesi naziri təyin olunub.
Sabiq nazir müavini 2012-ci ilin 11 dekabrda "Tərəqqi" medalına layiq görülüb.
Ailəlidir, bir oğlu var.
