QDF: \"Füzuli Mərkəzi Parkının layihəsi Füzuli İcması ilə müzakirə olunub\"
Qarabağ Dirçəliş Fondunun (QDF) təşəbbüsü ilə Füzuli Mərkəzi Parkının layihəsi ətrafında müzakirələr aparmaq məqsədilə silsilə görüşlər davam edir.
Sfera.az xəbər verir ki, növbəti belə görüş Füzuli icmasının nümayəndələri ilə həyata keçirilib.
Görüşdə Qarabağ Dirçəliş Fondunun İdarə Heyətinin sədri Rəhman Hacıyev, 84 saylı Füzuli seçki dairəsi üzrə deputat Vüqar Bayramov, parkın layihəçisi “By Medgalchi” şirkətinin direktoru Hüseyn Medqalçı, Füzuli icmasının nümayəndələri - Beynəlxalq Avrasiya Mətbuat Fondunun prezidenti Umud Mirzəyev, Elm və Təhsil Nazirliyinin İqtisadiyyat İnstitutunun baş direktoru Nazim Müzəffərli, Bakı Dövlət Universitetinin İngilis dili kafedrasının müdiri Bəylər Hacıyev, İkinci Qarabağ müharibəsi şəhidi Fəqan Zalovun atası Amil Zalov, Hərbi təqaüdçü Zahir Həsənov, “Tələt” firmasının direktoru Rafiq Rüstəmov, iş adamı Bəkir Babayev, təqaüdçü Ərşad Hüseynov, eləcə də Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəliyinin əməkdaşları Eldar Seyidov və Fidan Axundova, Qarabağ İqtisadi Rayonunda Bərpa, Tikinti və İdarəetmə Xidmətinin icraçı direktoru Övsət Həmidov, Xidmətin sədr müavini Səbuhi Abdullayev və digərləri iştirak ediblər.
Görüş iştirakçıları Füzuli Mərkəzi Parkının şəhərin həyatındakı rolu və əhəmiyyəti, parkda sosial-mədəni tədbirlərin keçirilməsi üçün müvafiq şərait, park ərazisində fəaliyyət növlərinə uyğun funksional zonaların yaradılması və digər mövzular ətrafında müzakirələr aparıblar.
Tədbiri giriş sözü ilə açan Qarabağ Dirçəliş Fondunun İdarə Heyətinin sədri Rəhman Hacıyev bildirib ki, Füzuli Mərkəzi Parkının konsept-layihəsi Prezident İlham Əliyevin tapşırıq və tövsiyələri nəzərə alınmaqla hazırlanıb. Onun sözlərinə görə, parkın salınması ərazidə ekoloji tarazlığın bərpasına ciddi töhfə verməklə yanaşı, həm Füzuli sakinlərinin, həm də şəhərin qonaqlarının, turistlərin istirahəti üçün ən gözəl məkanlardan birinə çevriləcək.
“By Medgalchi” MMC-nin direktoru, layihə rəhbəri Hüseyn Medqalçı Füzuli Mərkəzi Parkının layihəsi haqqında görüş iştirakçılarına geniş məlumat verib. Qeyd edib ki, müxtəlif ağac növlərinin və dekorativ kolların əkiləcəyi park sahəsində istirahət zonaları, açıq yaşıllıq sahələri, piknik və idman məqsədilə istifadə ediləcək zonalar, amfiteatr, kafe-restoranlar və s. kimi obyektlərin yaradılması nəzərdə tutulub.
Füzuli Mərkəzi Parkının pre-konsept layihəsi ilə tanış olan görüş iştirakçıları mövzu ilə bağlı rəy və təkliflərini səsləndiriblər. Onlar parkın layihələndirilməsi zamanı beynəlxalq qabaqcıl təcrübənin nəzərə alınmasını, xüsusən də Füzulidən olan insanların fikir və təkliflərinin öyrənilməsini müsbət qiymətləndiriblər.
İki saata yaxın davam edən müzakirənin sonunda Qarabağ Dirçəliş Fondunun İdarə Heyətinin sədri Rəhman Hacıyev səsləndirdikləri fikir və təkliflərə görə görüş iştirakçılarına təşəkkürünü bildirib.
Qeyd edək ki, Füzuli Mərkəzi Parkının layihələndirilməsi ilə əlaqədar aidiyyəti maraqlı tərəflərlə (steykholderlərlə) analoji görüşlər davam etdiriləcək.
Xatırladaq ki, layihə Qarabağ Dirçəliş Fondunun sifarişi ilə həyata keçirilir.
