Kiberdələduzluqla bağlı son aylarda ölkə üzrə müşahidə olunan şikayətlər göstərir ki, insanlar çox vaxt dələduzların sadəcə ad-soyad soruşduğunu, buna baxmayaraq, kartlarından pul çıxdığını bildirirlər. Reallıqda isə yalnız ad və soyadla kartdan vəsait çıxarmaq mümkün deyil.

Sfera.az bildirir ki, bu sözləri Axar.az-a açıqlamasında kibertəhlükəsizlik üzrə mütəxəssis Elnur Atayev ölkədə artmaqda davam edən kiberdələduzluqla bağlı danışarkən deyib.

“Dələduz ad-soyadı soruşmaqla sadəcə ünsiyyət qurur, etibar yaradır və qurbanın psixoloji baryerini aşağı salır. Ardından söhbəti başqa istiqamətə çevirərək “pul göndərmə”, “bonus aktivləşdirmə”, “mükafat qazanma”, “vergi qaytarılması”, “kuryer ödənişi” kimi bəhanələrlə kart məlumatlarını və ya bank tətbiqinə daxil olan SMS təsdiqləmə kodunu əldə etməyə çalışır. Yəni pulun çıxarılması qurbanın iştirakı ilə baş verir”, - o bildirib.

Mütəxəssisin sözlərinə görə, artıq iki aydan çox davam edən prosesin qarşısının niyə tam şəkildə alınmaması isə bir neçə obyektiv səbəbdən qaynaqlanır. Bu fəaliyyətlərin çoxu ölkə xaricindən idarə olunur, istifadə olunan nömrələr virtualdır, İP-lər gizlədilir və hər əməliyyatdan sonra yeni hesablar açılır:

“Bu hadisələr yalnız vətəndaşın məsuliyyəti kimi görünməməlidir. Kütləvi xarakter aldıqda artıq problem sistematik yanaşma tələb edir. Bankların anti-fraud mexanizmlərinin sərtləşdirilməsi, mobil operatorların saxta nömrələri daha tez bloklaması və sosial şəbəkələrdə şübhəli hesabların sürətli şəkildə ləğv edilməsi dövlət və özəl sektorun birgə həll etməli olduğu məsələlərdir. Bununla yanaşı, geniş kütlə üçün sadə və başadüşülən kibertəhlükəsizlik təlimləri keçirilməli, xüsusilə yaşlı və rəqəmsal savadlılığı zəif olan qruplar bu təlimlərə cəlb edilməlidir”.

Bank kartlarındakı pullar belə oğurlanır – Mütəxəssis