Bir vaxtlar Şotlandiyanın ucqar bir guşəsində adi bir ada olan Qruinard, İkinci Dünya Müharibəsi zamanı dünyanın ən təhlükəli yerlərindən birinə çevrilib. Bioloji silahların sınaqdan keçirilməsi bu adanın taleyini əbədi olaraq dəyişdirdi. Bu adanın dəhşətli keçmişi bioloji müharibə təcrübələrinin qorxunc qalıqlarını daşıyır. Bəs niyə ona "Çirklənmiş Bədheybət" deyilir?

Sfera.az bu yazıda sizə insanlar üçün qadağan edilən Qruinard Adasının qaranlıq tarixi barədə məlumat verir.

1930-cu illərin sonlarında Nasist Almaniyasının kimyəvi və bioloji silahlardakı səriştəsi Britaniyanı narahat etməyə başlayıb. Xüsusilə Almaniyanın kimya sənayesindəki üstünlüyü İngiltərəni mümkün bioloji hücuma hazırlaşmağa məcbur etdi.

1942-ci ildə İngiltərə laboratoriya testlərini real dünyaya köçürmək qərarına gəldi. Qərbi Şotlandiyada Rossşir sahillərində yerləşən Qruinard adası bu təcrübələr üçün mükəmməl yer idi.

İlk sınaqda, 60 qoyun hədəf alındı və adanın müxtəlif yerlərinə qarayara ilə dolu partlayıcı maddə bağlandı. Təcrübələrdən sonra bütün qoyunlar öldü.

Sonrakı sınaqlarda təyyarələrdən qarayara bombaları atıldı və nəticələr bütün adanı bioloji fəlakətə sürüklədi. Alimlər xəstəliyin təsirlərini öyrənmək üçün qoruyucu kostyumlarda adaya qayıtdılar və qoyunların meyitlərini autopsiya etdilər.

Adada aparılan bu sınaqların rəsmi izahı onların mümkün bioloji hücuma qarşı müdafiə olması idi. Lakin, Böyük Britaniya tərəfindən "Vegetarian Əməliyyatı" adlandırılan qaranlıq bir plan da üzə çıxdı.

Bu plana əsasən, həm heyvanları, həm də mülki şəxsləri yoluxdurmaq məqsədi ilə Almaniyanın kənd təsərrüfatı sahələrinə qarayara sporları olan yem atıldı. Xoşbəxtlikdən, bu dəhşətli plan heç vaxt həyata keçirilmədi.

Müharibə bitdikdən sonra ada ciddi şəkildə qadağan olunmuş ərazi elan edildi. Lakin, qarayara sporlarının torpaqda onilliklər ərzində aktiv qala biləcəyi aşkar edildi.

Yerli sakinlər tərəfindən adaya "çirklənmiş canavar" ləqəbi verilməsi təəccüblü deyildi. 1980-ci illərdə Britaniya hökuməti adanı təmizləmək qərarına gəldi. Qoruyucu geyim geyinmiş komandalar adaya gedib torpağı formaldehid və dəniz suyu qarışığı ilə dezinfeksiya etməyə başladılar.

Hər kvadrat metrə 50 litr dezinfeksiyaedici vasitə tətbiq edildi. 1987-ci ilin yayında adaya yerləşdirilən qoyunlarda xəstəlik əlamətləri müşahidə olunmadıqda, ada "təhlükəsiz" elan edildi.

1988-ci ildə Qruinard adası orijinal sahiblərinin varislərinə cəmi 500 funt sterlinqə satıldı. Bütün səylərə baxmayaraq, ada hələ də yaşayışsız qalır və keçmişin qorxunc əks-sədalarını daşımağa davam edir.

Aynil

Bu ada niyə insanlar üçün qadağan edilib?