Əhmədiyyə Cəbrayılov Ukraynada yad edilib
18:33 / 23.09.2020
2473
Kiyevdə Azərbaycan Respublikasının Ukraynadakı Səfirliyində II Dünya Müharibəsinin qəhrəmanı Əhmədiyyə Cəbrayılovun anadan olmasının 100 illiyi qeyd edilib.
Sfera.az xəbər verir ki, əfsanəvi qəhrəmanın ad gününün qeyd olunması Azərbaycan Respublikasının Prezidenti İlham Əliyevin 2020-ci ilin avqust ayının 11-də verdiyi sərəncama əsasən, hazırlanan tədbirlər çərçivəsində həyata keçirilib və Azərbaycandan kənarda keçirilən ilk tədbir olub.
Əhmədiyyə Cəbrayılovun xatirəsini yad etmək üçün Ukraynanın siyasi ictimai xadimləri, tarixçiləri və hərbçiləri tədbirdə iştirak edib.
Xatirə gecəsində Fransa Respublikasının Ukraynadakı səfiri Etyen de Ponsen də iştirak edərək azərbaycanlılara və Əhmədiyyə Cəbrayılova minnətdar olduğunu bildirib.
"Biz bu gün Əhmədiyyə Cəbrayılovun 100 illiyini qeyd edirik. Əhmədiyyə Azərbaycan və Fransanı birləşdirən bir şəxsdir. Fransa Respublikası Fransa bayrağı altında vuruşan heç bir qəhrəmanı ununtmayıb. Və mənim üçün bu gün burada Azərbaycan və Fransa qəhrəmanının xatirə gecəsində iştirak etmək böyük şərəfdir."
Tədbir iştirakçıları əfsanəvi partizan haqqında hazırlanan sənədli filmə baxdıqdan sonra onun haqqında öz fikirlərini bildirib, bəziləri isə xatirələri ilə bölüşüb.
Xatirə gecəsində çıxış edən Azərbaycan Respublikasının Ukraynadakı səfiri Elmira Axundova qonaqlara Azərbaycan əsgərlərinin bu günlərdə də göstərdiyi qəhrəmanlıqlardan danışdı.
İkinci Dünya Müharibəsində 600 mindən çox azərbaycanlı iştirak edərək qəhrəmanlıq göstərib. Onlardan biri də Əhmədiyyə Cəbrayılovdur. Ukrayna uğrunda gedən döyüşlərdə əsir düşən Əhmədiyyə əsirlikdən qaçaraq Fransa partizanlarına qoşulub və göstərdiyi şücaətlərə görə Fransa dövlətinin orden və medalları ilə təltif edilib və Fransa müqavimətinin lideri, sonra isə Fransa Respublikasının prezidenti olan Şarl De Qolla yaxın dost olub.( REAL TV)
