Tramp İrana hücum edəcək? - AÇIQLAMA

ABŞ Prezidenti Donald Tramp Ağ Evdə jurnalistlərə açıqlamasında bildirib ki, İranın nüvə silahı əldə etməsinin qarşısını almaqla Yaxın Şərqdə müharibələri dayandırmaq niyyətindədirlər.

"Əgər İran yenidən başlasa, bu, çox təhlükəli addım olacaq. Onlar işə başladıqdan sonra biz geri qayıdacağıq",- o qeyd edib.

Trampın bu açıqlaması hansı əsas mesajları və məqsədləri ehtiva edir?

Sözügedən məsələ ilə bağlı Sfera.az-a açıqlama verən siyasi şərhçi Ülviyyə Zülfüqar İsrail və İran arasında yaşanan gərginliyin bir neçə həftə öncə səngisə də, diplomatik sahədə əvvəlki kimi davam etdiyini və hətta daha da güclənmiş formada özünü göstərdiyini deyib. 

Onun sözlərinə görə, məlum olduğu kimi, İran da bu istiqamətdə bir sıra ölkələrlə müzakirələr aparır:

“Donald Trampın açıqlaması isə, məhz İranın Xarici İşlər nazirinin müavini Abbas Əraqçının uranın zənginləşdirilməsi ilə bağlı fikirlərindən sonra verildi. Trampın  "açıq və məmnun şəkildə cavab vermə" bəyanatı sadəcə siyasi mesaj deyil, daha çox xəbərdarlıq xarakteri daşıyır. Bu, konkret şəkildə İran tərəfinə ünvanlanmış bir ultimatumdur. Fikrimizcə bu bəyanatı yalnız siyasi mesaj kimi deyil, birbaşa xəbərdarlıq kimi dəyərləndirmək lazımdır. Regionda qarşıdurmanın qarşısının alınması və ya dayandırılması bu mövzu ilə birbaşa əlaqəli olmasa da, ABŞ öz narahatlığını və yanaşmasını dövlət başçısı səviyyəsində aydın şəkildə ifadə edib- həm də xəbərdarlıq formasında. Məqsəd isə ondan ibarətdir ki, əgər İran uranın zənginləşdirilməsi istiqamətində fəaliyyətini gücləndirərsə, qarşısında ABŞ-nin timsalında ciddi güclərlə üz-üzə qalacaq”.

Fidan Hacızadə
Sfera.az