İsrail Qəzza məsələsində güzəşt etmir - Səbəb nədir?

İsrail Qəzzaya humanitar yardım dəhlizi açmaq istəmir. Regionda humanitar böhranın daha da dərinləşdiyi bir vaxtda Tel-Əvivin bu addımı, müxtəlif siyasi dairələr tərəfindən strateji və siyasi məqsədlərlə izah edilir. 

Məsələ ilə bağlı Sfera.az-a açıqlama verən politoloq Aqşin Kərimov bildirib ki, İsrailin Qəzzaya humanitar dəhliz açmaq istəməməsi onun radikal siyasət yürütməsinin bariz nümunəsidir.

Ekspertin sözlərinə görə, İsrail Fələstin münaqişəsinin həlli ilə bağlı strategiyasında sərt və dəyişməz mövqeyini qoruyub-saxlayır. A. Kərimov əlavə edib ki, İsrail ABŞ ilə müttəfiq olsa da, Fələstin münaqişəsinin həllində Vaşinqtonla yekun ortaq nöqtədə birləşməkdə maraqlı deyil. 

Siyasi təhlilçi Türkiyənin Yaxın Şərqdə böyüyən geosiyasi əhəmiyyətinə də diqqət çəkib:

“Yaxın Şərqdə Türkiyənin artan nüfuzu fonunda İsrail Qəzza siyasətini yeni fazaya keçirir. Çünki Türkiyənin bölgədə güclənməsi İsrailin maraqlarına uyğun deyil. Bununla belə, gələcəkdə İsrail-Türkiyə arasında danışıqların baş tutması da istisna oluna bilməz”.

Ekspert qeyd edir ki, İsrailin bölgədəki mövcud vəziyyəti də onu daha sərt addımlar atmağa vadar edir:

“İsrail hazırda dörd tərəfdən müharibə mühasirəsindədir – Livan, HƏMAS, Suriyada yeni geosiyasi quruluşun yaranması və İran təhlükəsi. Bu vəziyyət İsrailin radikallaşmasına səbəb olur. İsrail ABŞ ilə müttəfiq olsa da, bir çox məsələdə Ağ Evin maraqlarını qəbul etməmək üçün səylərini davam etdirir”.

Kərimov əlavə edib ki, HƏMAS-ın tamamilə ləğv olunması yaxın perspektivdə real görünmür:

“HƏMAS-ın dəstəkçiləri arasında İranla yanaşı, Türkiyə də yer alır. Gerçəklik isə budur ki, İran artıq Hizbullahı belə İsrailə qarşı hərbi əməliyyatlara cəlb etməkdə çətinlik çəkir. Amma HƏMAS hələ də tam məhv edilməyib və döyüşlər davam edir”.

Politoloqun fikrincə, bu səbəbdən də İsrailin Qəzza müharibəsində maksimalist məqsədlərinə çatıb-çatmayacağı sual altındadır.

Bəsti Rəfizadə
Sfera.az