Uzaq Şərqdə gərginlik azalır: Ölkələr sülh masasına oturdu

Kamboca və Tailand arasında sərhəd boyunca beş gündür davam edən və onlarca insanın ölümünə səbəb olan silahlı toqquşmalardan sonra tərəflər sülh danışıqlarına başlayıb. Danışıqlar Malayziyanın Putracaya şəhərində keçirilir. Prosesi ABŞ və Çin də dəstəkləyir.

Sfera.az xarici mediaya istinadən xəbər verir ki, iclas Malayziya Baş naziri Ənvər İbrahimin iqamətgahında baş tutub.

İbrahim hazırda ASEAN regional təşkilatının sədri kimi danışıqlara vasitəçilik edir. Görüşlərdə ABŞ və Çinin Malayziyadakı səfirləri də iştirak edib.

Tərəflər qarşıdurmanın məsuliyyətini bir-birinin üzərinə atır. 817 kilometrlik sərhəddə artilleriya atəşləri ilə müşayiət olunan döyüşlər nəticəsində onlarca əsgər və dinc sakin həyatını itirib.

Kamboca Baş naziri Hun Manet danışıqların ABŞ və Malayziyanın təşəbbüsü ilə başladığını, Çinin də bu prosesə qoşulduğunu açıqlayıb. O bildirib ki, əsas məqsəd ABŞ Prezidenti Donald Trampın vasitəçiliyi ilə dərhal qüvvəyə minəcək bir atəşkəs razılaşmasına nail olmaqdır.

Tramp isə bəyan edib ki, münaqişənin davam etdiyi təqdirdə hər iki ölkə ilə planlaşdırılan ticarət razılaşmaları baş tutmayacaq. Onun bu xəbərdarlığından sonra tərəflərin uzlaşmaya daha meyilli olduqları qeyd olunur.

Tailand tərəfi isə ehtiyatlı yanaşır. Baş nazir müavini Phumtam Veçayacay Kambocanın səmimiyyətinə şübhə ilə yanaşdıqlarını bildirib: “Kambocaya güvənmirik. İndiyə qədərki davranışları problemin həllinə yönəlməyib”, – deyə o bildirib.

Tailand Kambocanı beynəlxalq hüququ pozmaqda ittiham edir, lakin mülki əhalinin təhlükəsizliyi üçün atəşkəsin vacibliyini vurğulayır. Kamboca isə bu iddiaları rədd edərək, Tailandı mülki əhalini təhlükəyə atmaqda günahlandırır və beynəlxalq ictimaiyyəti bu davranışı qınamağa çağırır.

Qeyd edək ki, gərginlik may ayının sonunda Kamboca əsgərinin həlak olması ilə nəticələnən insidentdən sonra artmağa başlamışdı. Hazırda tərəflər arasında danışıqlar davam edir.

Bəsti Rəfizadə
Sfera.az