“Astronomer” texnologiya şirkətinin HR direktoru Kristin Kabot “Coldplay” konsertində evli müdiri Endi Bayron ilə cinayət başında yaxalanan insidentdən sonra rəsmi olaraq istefa verib.

Sfera.az bildirir ki, HR direktoru ötən həftə baş verən qalmaqaldan sonra iyulun 24-də istefa verib. Bu barədə Nyu-York firmasının nümayəndəsi bildirib.

"Mən təsdiq edə bilərəm ki, Kristin Kabot artıq “Astronom”da deyil. O, istefa verib" - deyə o bildirib.

Qeyd edək ki, hadisə ötən çərşənbə günü Boston yaxınlığındakı Gillette Stadionunda baş verib. Bir-birini qucaqlayan cütlüyün üzərində qəfildən kamera dayanıb. Böyük ekranda özlərini görən Kabot və Bayron kameralardan gizlənməyə çalışıblar.

“Coldplay” qrupunun solisti Kris Martin vəziyyəti təəccüblə şərh edib:

"Ya onların münasibəti var, ya da sadəcə çox utancaqdırlar".

Dünyanın hər tərəfinə sızan görüntülər böyük qalmaqala səbəb olub.

İnternetdə yayılan görüntülərdə cütlüyün konsert zamanı dəfələrlə öpüşdüyü, qucaqlaşdığı və bir-biri ilə birlikdə mahnı oxuduğu, həmçinin “Yellow” mahnısına oynadığı görünür.

Qalmaqal sosial mediada geniş yayıldıqdan və minlərlə mem meydana gətirdikdən sonra CEO vəzifəsindən istefa verən ilk şəxs Bayron olub.

Xatırladaq ki, insidentdə adı hallanan hər iki tərəf başqa şəxslərlə evlidir. Kabot “Privateer Rum” şirkətinin baş direktoru Endryu Kabot ilə evlidir. Cütlüyün 2,2 milyon dollarlıq evləri var. Bayron Meqan adlı müəllimlə evlidir. Onların iki övladı var.

Şirkət məşhurlaşıb

Əvvəllər şirkətin baş məsul direktoru olmuş şirkətin həmtəsisçisi Pit DeJoy yeni icraçı direktor vəzifəsinə təyin edilib.

"Komandamız üçün diqqət qeyri-adi və sürreal idi və mən bunun belə olmasını heç vaxt istəməzdim, “Astronom” indi bütün dünyada məşhurdur"-deyə DeJoy “LinkedIn”də açıqlama verib.

Endi Bayron və Kristin Kabot iş həmkarları ilə

"Son bir neçə gündə baş verən hadisələr bir neçə şirkətin, xüsusən də məlumat və süni intellektlə işləyən startapların heç vaxt qarşılaşmadığı medianın diqqətini çəkib. “Astronomer”də biz heç vaxt problemdən çəkinməmişik"-deyə DeJoy əlavə edib.

Şirkət keçmiş rəhbərlər arasında mümkün ofis romantikasını rəsmi şəkildə araşdırıb. Nə Bayron, nə də Kabot hələlik məsələ ilə bağlı açıqlama verməyiblər.

Aynil

Konsertdə evli müdirini öpən qadın işini itirdi - FOTOLAR