Hindistanda baş verən “deepfake” qalmaqalı süni intellekt texnologiyalarının sui-istifadəsi və rəqəmsal məxfiliyin pozulması ilə bağlı ciddi narahatlıqlar yaradıb.

Sfera.az xəbər verir ki, “BBC”nin məlumatına görə, Assam ştatının Dibruqark şəhərində yaşayan evdar qadın Sançinin fotoları süni intellekt vasitəsilə manipulyasiya edilərək saxta “Instagram” fenomeni yaradılıb.

“Babydoll Archi” adlı hesabda yayımlanan erotik görüntülər qısa zamanda 1,4 milyon izləyici toplayıb və sosial şəbəkələrdə geniş yayılıb.

Araşdırma nəticəsində məlum olub ki, hesabı Sançinin keçmiş sevgilisi Pratim Bora yaradıb. Mühəndislik təhsilli Bora, “ChatGPT” və “Dzine” kimi süni intellekt alətlərindən istifadə edərək Sançinin şəxsi fotoları əsasında saxta vizual məzmunlar hazırlayıb. Onun bu addımı intiqam məqsədilə atdığı bildirilir.

Sözügedən hesab vasitəsilə yalnız Linktree platforması üzərindən təxminən 1 milyon rupi (təqribən 12 min ABŞ dolları) gəlir əldə edilib. Təkcə son günlərdə isə hesabın 300 min rupi qazandığı müəyyən olunub.

Sançinin ailəsinin polisə müraciətindən sonra məsələ ictimailəşib və Bora saxlanılıb. O, cinsi təcavüz, kiber fırıldaqçılıq və nüfuzu zədələmə kimi ittihamlarla üzləşib. Əgər günahı sübuta yetirilərsə, onu 10 ilədək həbs cəzası gözləyir.

Hadisədən dərin psixoloji sarsıntı keçirən Sançi və ailəsi hazırda psixoloji dəstək alır. Hüquqşünaslar və texnologiya mütəxəssisləri bu hadisəni süni intellektin sui-istifadəsi və qadınlara qarşı rəqəmsal zorakılığın təhlükəli nümunəsi kimi qiymətləndirir.

Ekspertlər “deepfake” texnologiyasının getdikcə daha asan əldə olunması fonunda oxşar halların artacağı barədə xəbərdarlıq edirlər.

Bəsti Rəfizadə
Sfera.az

Süni intellektlə qisas: Hindistanda "Deepfake" faciəsi yaşanıb