Urmiya gölü bərpa ediləcək

İranın Qərbi Azərbaycan əyalətində yerləşən Urmiya gölünün bərpası ilə bağlı 27 qərar qəbul edilib.

Sfera.az “Mehr” agentliyinə istinadən xəbər verir ki, bunu Urmiya gölünün xilas edilməsi üzrə Milli İşçi Qrupunun katibi Reza Rəhmani Qərbi Azərbaycan əyalətində sözügedən məsələyə dair keçirilən iclasda çıxışı zamanı deyib.

"Urmiya gölü hamı üçün vacibdir və bizim ən mühüm missiyamız onun bərpası planlarını həyata keçirməkdir. Bu gün biz bilməliyik ki, Urmiya gölü haqqında ən çox narahat olanlar gölə yaxın ərazilərin sakinləridir", - deyə o vurğulayıb.

Qərbi Azərbaycan əyalətinin başçısı Məhəmməd Əmin Rzazadə isə bildirib ki, Urmiya gölünün quruması hadisəsi hökumətə hücum alətinə çevirilməməlidir.

İclas iştirakçıları qeyd ediblər ki, Urmiya gölünə tökülən suyun suvarma işlərinə sərf edilməsi gölün səviyyəsinin düşməsinə səbəb olur.

Mütəxəssislər hesab edirlər ki, İran hakimiyyətinin su ehtiyatlarından plansız istifadəsi səbəbindən Urmiya gölü quruyur.

Firuzə Əliyeva
Sfera.az