Görüş var, nəticə yox - 24 iyul danışıqlarından gözləntilər
Rusiya-Ukrayna müharibəsi davam etdiyi bir vaxtda tərəflər arasında aparılan danışıqlar, dünya ictimaiyyəti üçün maraq doğurmağa davam edir. Uzun müddətdir ki, bu münaqişənin diplomatik yollarla həlli istiqamətində müxtəlif formatlarda təşəbbüslər irəli sürülür. Tərəflər arasında daha əvvəl keçirilən görüşlər sülhə aparan real addımlar kimi qiymətləndirilməsə də, bu cür cəhdlərin davam etməsi beynəlxalq ictimaiyyətin ümidini qoruyub saxlayır. Məhz belə bir fonda, iyulun 24-də İstanbulda Ukrayna və Rusiya arasında növbəti görüş olacaq.
Bu görüşdə hansı məsələlərlə bağlı razılaşma mümkündür?
Mövzu ilə bağlı Sfera.az-a açıqlama verən siyasi şərhçi Kənan Novruzov bu danışıqların nəticəsinin olmayacağını düşündüyünü bildirib.
Onun sözlərinə görə, Türkiyənin beynəlxalq vasitəçiliyi aktuallığını qorusa da, bu, ümumilikdə sülh prosesinə aparıb çıxarmayacaq.
K.Novruzov qeyd edib ki, sülh əldə olunması üçün ABŞ və Avropa dil tapmalıdır, onların maraqları yaxınlaşmalıdır:
“ABŞ istəyir ki, müharibə dayansın, Ukraynaya investisiya qoysun, Rusiya ilə münasibətlərini normallaşdırsın və diqqətini yönəltsin Yaxın Şərqə. Avropa isə bunu istəmir, əksinə müharibənin uzanması tərəfdarıdır. Müharibə bitsə, Rusiya qonşu ölkələr, eləcə də Avropa üçün yenidən təhdidə çevrilə bilər. ABŞ diplomatik təmaslar edir, Avropa isə Ukraynanı silahlandırır. Bu səbəbdən, sözügedən iki tərəfin maraqları uyğunlaşmalıdır. Bu rəqabət davam etdikcə heç bir sülhdən söz gedə bilməz”.
Firuzə Əliyeva
Sfera.az
