Yeni dişləri turistlərə baha başa gəldi: Həbs edildilər
32 yaşlı britaniyalı Corciya Harrison yeni dişlərini qeyd etmək üçün həyat yoldaşı ilə Türkiyəyə tətilə gəlib. Problemlər cütlüyün hava limanına qədər otel işçiləri tərəfindən izlənilməsi ilə başlayıb.
Sfera.az bildirir ki, Corciya Harrison tələyə düşdüyünü deyir. Hətta Britaniya səfirliyi də ona kömək edə bilməyib.
Rochdale şəhərində təmizlikçi işləyən qadının özü "həyatının ən böyük səhvini" etdiyini etiraf edir. O, iyunun 18-də mediaya 12 yaşlı qızı Poppinin yanına qayıtmalı olduğunu bildirib.
Harrison, həyat yoldaşı Arron Tiqe ilə birlikdə mayın 2-də Antalyaya uçub, mayın 7-də evə dönməli idi. Tətildə cütlük yeni vinir dişlərini qeyd etmək üçün ziyafət təşkil edərək əyləniblər.
Qadın araq və spirtli kokteyllər içib, bundan sonra otelin hamamında təsadüfən şüşə arakəsməni sındırıb. O, spirtlə antipsikotikləri qarışdırdıqdan sonra huşunu itirdiyini iddia edir. Harrison bunun necə baş verdiyini heç xatırlamadığını bildirir.
Təşvişə düşən cütlük ertəsi gün səhər oteldən ayrılaraq taksi ilə hava limanına gedib. Onlar Böyük Britaniyaya uçmaq niyyətində idilər, lakin avtomobilin qarşısı üç maşın tərəfindən kəsilib və qorxan taksi sürücüsü polisə müraciət etməli olub. Sonda cütlük həbs edilib.
Qeyd olunur ki, hava limanına avtomobil təqibi sınıq duşdan artıq xəbərdar olan otel işçiləri tərəfindən təşkil edilib. Britaniyalılar həbsxana kamerasına salınaraq vəkilsiz sorğu-sual edilib. Harrison ingilisdilli vəkil tələb edərək suallara cavab verməkdən imtina etdiyini bildirib. Ancaq bu, yalnız həbsə müqavimət ittihamı ilə nəticələnib.
Qadının sözlərinə görə, o, məhkəməyə aparılmazdan əvvəl 300 nəfərlik kamerada qalıb və ölkədən çıxışına qadağa qoyulub. Ondan mehmanxanaya 15 min funt-sterlinq təzminat ödəməsi tələb olunur.
"Mən tələyə düşdüm, 15 min funt sterlinqim yoxdur. Vəkilə pul vermişəm, otellər üçün pul vermişəm, ev kirayəsinə pul vermişəm. Buradan çıxmaq üçün çox yollar sınamışam, amma heç nə alınmır, uçuruma dirənmişəm. Etdiyim işin səhv olduğunu bilirəm, amma məni öldürür. Qızımın yanına getməliyəm" - deyə qadın səhvini qəbul edir.
İngilis qadın vəziyyəti dəhşətli kimi xarakterizə edərək, nəyisə dəyişdirmək üçün əlindən heç nə gəlmədiyini bildirir. Səfirliklə əlaqə saxlasa da, ona səyahət qadağasını qaldırmağa kömək edə bilməyəcəklərini deyiblər. Qadın hadisədən sonra təxminən 7 həftədir ki, Türkiyədədir və orada qeyri-müəyyən müddətə saxlanılacağından qorxur.
Harrison Yunanıstana qayıqla getmək də daxil olmaqla, ölkəni tərk etmək üçün müxtəlif yollar sınayıb. Hər dəfə onu pasport nəzarətindən geri qaytarıblar. O, övladının yanına qayıtmaq istəyir, lakin vəkili ona məhkəməni gözləməyi məsləhət görür. Bunun nə qədər çəkəcəyi məlum deyil.
"Mən burada yaşamağa davam edə bilmərəm. Altı həftədən artıqdır ki, burada səssizcə oturmuşam, amma əziyyət çəkirəm və heç nə dəyişmir" - deyə təmizlikçi qadın yekunlaşdırıb.
Aysel
