ABŞ-də etiraz dalğası yayılır - Kimdir MÜQƏSSİR?
Son günlər ABŞ-nin bəzi ştatlarında komendat rejimi elan olunub. Belə ki, Vaşinqtonun ştatı Spokanın bir rayonunda və Los Ancelesdə komendant saatı tətbiq edilib.
Buna səbəb isə qeyri-qanuni mühacirlərə dəstək məqsədilə keçirilən nümayişlərdir.
Mühacirləri hədəf alan həbs dalğası fonunda artan narazılığın daha geniş vüsət alacağı iddia edilir.
Maraqlıdır, etirazların ölkə üzrə yayılma ehtimalı nə qədərdir? Etirazların şiddətlənməsində kənarda müdaxilələrin, güclərin rolu ola bilərmi?
Mövzu ilə bağlı Sfera.az-a açıqlama verən siyasi şərhçi Kənan Novruzov bildirib ki, bu cür proseslər kənardan da idarə oluna bilər.
Onun sözlərinə görə, bu aksiyalar Tramp ilə sahibkar İlon Mask arasında münasibətləri kəskinləşdirir və həmçinin Rusiya ilə müəyyən gərginləşmələrin olduğu vaxta təsadüf edir:
“Tramp hakimiyyətə gəldiyi ilk vaxtlarda Rusiya ilə münasibətlər yaxşı idi, amma sonra biz gördük ki, Rusiya Trampın bəzi şərtləri ilə razılaşmadı. Tramp başladı Rusiyanı sanksiyalarla hədələməyə, eyni zamanda rusiyalı həmkarı Vladimir Putin haqqında deyir ki, o, odla oynayır. Yəni, görünür ki, artıq tərəflər arasında soyuq küləklər əsməyə başlayıb. Belə bir vaxtda ABŞ-də aksiyaların başlanması haqqında danışarkən prosesin kənardan idarə olunması ehtimalını istisnə elmək olmaz”.
K.Novruzovun fikrincə, proseslərdə Rusiyanın da əli var, lakin qarşısı alınacaq.
Siyasi şərhçi Maskla artan gərginlik və ümumiyyətlə Trampın reytinqinin, Trampa etimadın azalması fonunda gələcəkdə ABŞ prezidenti ilə bağlı impiçment məsələsinin gündəmə gəlməsinin mümkünlüyünü də istisna etməyib.
Firuzə Əliyeva
Sfera.az
