Trampla Putin nə danışıb? - TƏFƏRRÜATLAR
ABŞ Prezidenti Donald Tramp Rusiya lideri Vladimir Putinlə münasibətlərindən və Ukrayna münaqişəsinin həlli ilə bağlı son telefon danışığından danışıb.
Sfera.az “TASS” agentliyinə istinadən xəbər verir ki, Tramp iyunun 4-də baş tutan və 1 saat 10 dəqiqə davam edən telefon danışığının əsas mövzusunun müharibə və onun sona çatması olduğunu bildirib.
“Onunla əla münasibətim var idi və əgər seçkilər saxtalaşdırılmasaydı, Ukrayna ilə bu müharibə heç vaxt baş verməzdi,” – deyə Tramp “New York Postun Pod Force One” podkastında çıxışı zamanı qeyd edib.
O əlavə edib ki, söhbətləri “yaxşı keçib”, lakin hələlik konkret nəticə əldə olunmayıb.
Tramp, Putinin telefon danışığında Moskvanın Vaşinqtondan nə gözlədiyini açıqlayıb-açıqlamadığı sualına belə cavab verib: “O, istədiyini danışdı, istəmədiyini danışmadı”.
Ukraynada davam edən müharibəni “qəddar” adlandıran Tramp bildirib ki, İkinci Dünya Müharibəsindən bəri belə bir şey olmayıb: “Biz irəliləyiş əldə edirik və sonra birdən bombalanmaması lazım olan bir şey bombalanır və bu, tərəqqinin sonu olur”.
Fidan Hacızadə
Sfera.az
