Qərb Kiyev üçün yeni planlar hazırlayır
ABŞ Prezidenti Donald Trampın administrasiyası Ukraynaya silah verməkdən imtina edərsə, Qərb dövlətləri Kiyevə dəstəyi davam etdirmək üçün yeni planlar hazırlayır.
Sfera.az “Daily Telegraph” nəşrinə istinadən xəbər verir ki, bu məqsədlə “istəklilər koalisiyası” adlandırılan qrupun Haaqada keçirilən toplantısında gərgin və ümidsiz əhval-ruhiyyə müşahidə olunub.
Adının açıqlanmasını istəməyən Qərb rəsmilərindən biri deyib: “Gəlin realist olaq və ABŞ-nin heç vaxt bu gəmidə olmayacağını qəbul edək”.
Qəzetin bildirdiyinə görə, iclasda əsas müzakirə mövzusu ABŞ-nin yalnız məhdud kəşfiyyat sahəsində dəstəyini saxlayacağı ehtimalı fonunda Ukraynaya dəstəyin necə davam etdirilməsi olub. Avropa rəsmilərindən biri qeyd edib ki, iclas iştirakçıları həmçinin Rusiyaya qarşı iqtisadi təzyiqlərin artırılmasının vacibliyi barədə ortaq fikrə gəliblər.
Tramp administrasiyasının qeyri-müəyyən mövqeyi Böyük Britaniya və Fransanı atəşkəsdən sonra Ukraynaya qoşun göndərmək planlarından imtina etməyə və Vaşinqtondan asılı olmayaraq uzunmüddətli dəstək strategiyası formalaşdırmağa vadar edib.
Fidan Hacızadə
Sfera.az
