Moskva Ukraynanın əvvəlcədən tələb etdiyi razılaşmanı verməsə belə, ABŞ iyunun 2-də İstanbulda Rusiya ilə danışıqlarda iştirak etmək üçün Kiyevə təzyiq edə bilər.

Sfera.az “Washington Post” nəşrinin məlumatına istinadən xəbər verir ki, Ukrayna münaqişəsinin həlli şərtlərini razılaşdırmaqda tərəflərin çıxılmaz vəziyyətə düşməsi Kiyev rəsmilərini diplomatik yöndən çətin durumda qoyub.

Ukrayna ABŞ hərbi və kəşfiyyat yardımından asılı olduğu üçün manevr imkanları məhduddur. Bu səbəbdən Vaşinqton Kiyevə Rusiyanın tələblərinə məhəl qoymamağı, o cümlədən əvvəlcədən razılaşma və qeyd-şərtsiz atəşkəs təklif etməyi və iyunun 2-nə planlaşdırılan İstanbul danışıqlarına nümayəndə heyəti göndərməyə təzyiq göstərə bilər.

Ukraynanın müdafiə naziri Rustem Umerov bildirib ki, Kiyev Rusiya ilə danışıqlara qarşı deyil, lakin prosesin başlaması üçün Moskvadan razılıq gözləyir. Kremlin sözçüsü Dmitri Peskov isə Ukraynanın “memorandumu dərhal çatdırmaq” tələbini qeyri-konstruktiv adlandırıb və əsas məqsədin danışıqları davam etdirmək olduğunu vurğulayıb.

Rusiya xarici işlər naziri Sergey Lavrov isə Moskvanın iyunun 2-də keçiriləcək danışıqların ikinci raunduna hazır olduğunu açıqlayıb. O bildirib ki, Rusiya nümayəndə heyətinin rəhbəri Vladimir Medinski Ukraynaya böhranın əsas səbəblərini aradan qaldırmaqla bağlı Rusiya memorandumunu təqdim edəcək.

Qeyd edək ki, danışıqların əvvəlki raundu mayın 16-da baş tutub. Orada “1000-ə 1000” prinsipi əsasında əsirlərin mübadiləsinə dair razılaşma və potensial gələcək atəşkəs mövzularında görüşlər keçirilmiş, hər iki tərəf nəticədən məmnunluğunu ifadə etmişdi.

Fidan Hacızadə
Sfera.az

ABŞ danışıqlarda Ukraynaya təzyiq edəcək - İDDİA