İspaniyada bu gün səhər saatlarında ölkə miqyasında sabit, mobil telefon xətləri və internet xidmətlərində ciddi nasazlıq yaşanıb. Bir neçə həftə əvvəl baş verən genişmiqyaslı elektrik kəsintisindən sonra bu dəfə də rabitə və internet infrastrukturu çöküb.

Sfera.az xəbər verir ki, İspaniyanın nüfuzlu “El Pais” qəzetinin məlumatına görə, “Telefonica” şirkətinin şəbəkəsində aparılan texniki yeniləmə işləri zamanı baş verən nasazlıq nəticəsində başda 112 olmaqla bir çox təcili yardım xətləri də daxil olmaqla mobil və sabit rabitə xidmətləri dayanıb. Problem əsasən Araqon, Endülüs, Ekstremadura, Navarra, Bask və Valensiya kimi muxtar bölgələrdə müşahidə olunub.

“Telefonica”dan verilən açıqlamada, bəzi şirkətlərə məxsus xidmətləri təsir edən texniki işlərin aparıldığı və yaranan problemin aradan qaldırılması üçün işlərin davam etdiyi bildirilib.

İspaniya Rəqəmsal Transformasiya və Dövlət Xidmətləri Nazirliyi də vəziyyəti nəzarətdə saxladıqlarını və problemin həllinə dair ətraflı məlumat tələb etdiklərini açıqlayıb.

Rabitə problemləri yerli vaxtla saat 06:00-dan etibarən Madriddən Bilbao və Barselonaya qədər bir çox iri şəhərləri əhatə edib.
Araqon bölgəsində bəzi təcili yardım xətləri bərpa edilsə də, digər bölgələrdə problemlər hələ də davam edir. Vətəndaşlara alternativ təcili yardım nömrələri təqdim olunub.

Xatırladaq ki, aprelin sonunda İspaniya elektrik şəbəkəsində yaşanan nasazlıq nəticəsində Fransa ilə enerji bağlantısı tamamilə kəsilmiş, ölkə Avropa elektrik sistemindən təcrid olunmuş və Portuqaliya ilə birgə enerji sistemi çökmüşdü.

Bəsti Rəfizadə
Sfera.az

İspaniyada telefon və internet xidmətləri çökdü