"Dərhal təxliyə olun" - Hücum əmri verildi

İsrail Müdafiə Qüvvələrinin (IDF) sözçüsü Aviçai Adrai Qəzza zolağının cənubundakı Xan Yunis şəhərinin, eləcə də Bəni Süheylə və Abasan əl-Kəbirə şəhərlərinin sakinlərinə dərhal evlərini tərk etməyi əmr edib.

Sfera.az bu barədə xarici mediaya istinadən xəbər verir.

Aviçai Edri bildirib ki, İsrail ordusu bu ərazilərdə terror təşkilatlarının potensialını məhv etmək məqsədilə görünməmiş miqyasda hücuma keçəcək:

“Dərhal qərb istiqamətində yerləşən Əl-Məvasi bölgəsinə təxliyə olun. Xan Yunis ərazisi təhlükəli döyüş zonası hesab olunacaq”.

Bundan əvvəl verilən məlumata görə, gecə İsrail hərbçiləri Deyr əl-Bələh əyaləti, Bəni Süheylə şəhəri (Xan Yunis vilayəti), köçkünlər üçün Nuseyrat düşərgəsi və Qəzza şəhərindəki bir sıra hədəfləri atəşə tutub.

Fələstin mətbuatının yaydığı məlumata əsasən, son 24 saat ərzində həyata keçirilən hava zərbələri nəticəsində azı 148 nəfər həlak olub. Eyni zamanda, İsrail ordusu cümə günü axşam saatlarında Qəzza zolağında “Gideonun arabaları” adlı genişmiqyaslı hücuma keçdiyini açıqlayıb. Bildirilib ki, bu əməliyyat “girovların azad olunması və HƏMAS-ın məğlub edilməsi də daxil olmaqla” bütün strateji məqsədlərə çatmağa yönəlib. Ordunun məqsədi HƏMAS-ın nəzarətində olan Qəzza zolağında əsas əraziləri ələ keçirməkdir.

Fidan Hacızadə
Sfera.az