Deputat intihara cəhd etdi
Sloveniyada müxalifətdə olan Sloveniya Demokratik Partiyasının (SDS) deputatı Andrej Hoivik cümə günü parlament binasının damına çıxaraq özünü yerə atmaqla hədələyib.
Sfera.az xarici mediaya istinadən xəbəd verir ki, hadisə zamanı Hoivik izdiham qarşısında çıxış edərək baş nazir Robert Qolobu da daxil olmaqla heç kimi günahlandırmadığını bildirib.
“Bu ölkəyə etdikləri düzgün deyil”, – deyə qışqıran deputatın emosional vəziyyətdə olduğu müşahidə olunub.
Hadisə şahidlərinin sözlərinə görə, Hoivik damda olan bir qadına qışqıraraq, “Zəhmət olmasa, bir addım da atsanız, atlayacam”,- deyə hədə-qorxu gəlib.
Hadisə yerinə dərhal polis, yanğınsöndürən və təcili yardım qrupları cəlb olunub. Deputat Hoivik peşəkar xilasedicilər tərəfindən damdan sağ-salamat endirilib. Polis onun və digər şəxslərin hadisə zamanı xəsarət almadığını açıqlayıb.
Deputatın bu addımı atmasına səbəb hələ ki, rəsmi olaraq açıqlanmayıb. Lakin yerli media Hoivikin son həftələrdə emosional tükənmə və ağır psixoloji gərginlik yaşadığını, həmçinin ciddi yorğunluq əlamətləri göstərdiyini qeyd edib.
SDS partiyasının lideri və keçmiş baş nazir Janez Jansa sosial şəbəkədə Hoiviki dəstəkləyərək, “Andrej Hoivik, dayan, tək deyilsən” paylaşımı ilə çıxış edib. Partiyanın parlament fraksiyası isə məsələ ilə bağlı yaydığı bəyanatda bu sözləri qeyd edib: “Bəzən həyatın bizə verdiyi sınaqlar çox çətin ola bilər. Hər kəsdən anlayış və dəstək gözləyirik”.
Hadisə ictimaiyyətdə geniş rezonansa səbəb olub. Rəsmi qurumlar hələlik məsələ ilə bağlı əlavə açıqlama verməyiblər.
Fidan Hacızadə
Sfera.az
