Rubio: "Tramp artıq qərar verməlidir"
ABŞ Ukraynadakı münaqişənin nizamlanması prosesindən geri çəkilmək niyyətində deyil, lakin dünya gündəmində daha önəmli məsələlərin olduğunu anlayır.
Sfera.az “TASS” Agentliyinə istinadən xəbər verir ki, bu fikirləri ABŞ-nin Milli Təhlükəsizlik Müşaviri və eyni zamanda Dövlət Katibi vəzifəsini icra edən Marko Rubio “Fox News” telekanalına açıqlamasında səsləndirib.
“Biz bu məsələdən imtina etməyəcəyik. Lakin elə bir məqam gəlir ki, Prezident Donald Tramp hökumətin ən yüksək səviyyələrində bu məsələyə daha nə qədər vaxt ayıracağına qərar verməlidir”,-Rubio deyib.
O qeyd edib ki, Ukraynada davam edən müharibənin əhəmiyyətsiz olduğunu söyləmək olmaz, lakin uzunmüddətli baxışla Çinlə bağlı baş verənlər daha böyük strateji əhəmiyyət kəsb edir.
Rubio həmçinin vurğulayıb ki, ABŞ həm Moskvanın, həm də Kiyevin mövqelərini anlayır:
“Onlar bir-birinə yaxın görünürlər, lakin hələ də aralarındakı fərq böyükdür. Düşünürəm ki, yaxın zamanda bu prosesdə ciddi bir dönüş baş verəcək, əks halda prezident bu məsələyə daha nə qədər diqqət ayrılmalı olduğunu müəyyən etməlidir”.
Fidan Hacızadə
Sfera.az
