Dubayda minlərlə lüks avtomobilin tərk edilməsinin səbəbləri - FOTOLAR

Lamborghini, Ferrari, Bentley... Hamısı Dubay küçələrində toz yığmaq üçün qalıb. Bir çoxumuz bu şəhəri dəbdəbə və əzəmətlə əlaqələndirsək də, superkarların çürüməyə buraxıldığı acı bir reallıq var. Üstəlik, bu avtomobillərin sayı az deyil, hər il minlərlə maşın öz taleyinə buraxılır. Bəs bu qədər zəngin şəhərdə bu necə mümkündür?

Sfera.az bu yazıda sizə biznesin arxa planını təqdim edir.

 

Niyə bu qədər lüks avtomobillər tərk edilir?
 

Dubaya gələn bir çox insan yüksək maaş və dəbdəbəli həyat arzusu ilə böyük addımlar atır. Ancaq hər kəsin arzusu gerçəkləşmir; işini itirən və ya gözlədiyi gəliri əldə edə bilməyənlər ağır borc yükü ilə üzləşirlər.
 

Dubayda şəriət qanunlarına görə, borcunu ödəyə bilməyənləri həbs cəzası gözləyir. Bu səbəbdən bəzi insanlar lüks avtomobillərini küçələrdə, dayanacaqlarda və ya hava limanlarında tərk edərək ölkədən qaçırlar. Bu vəziyyət təkcə əcnəbilərə aid deyil, eyni problemlə üzləşən yerli insanlar da var.
 

Avtomobil sahibləri avtomobillərini geri ala bilərlərmi?
 

Dubayda avtomobil tərk edilərsə, səlahiyyətlilər əvvəlcə sahibinə 15 günlük xəbərdarlıq göndərirlər. Sahibi geri qayıtmasa, avtomobil Dubay Bələdiyyəsi tərəfindən müsadirə olunur. Avtomobil altı ay ərzində tələb olunmazsa, o, hərraca çıxarılır. Bu prosesdə avtomobillər daha ucuz qiymətə yeni sahiblər tapa bilir.
 

Dubayda tərk edilmiş bu lüks avtomobilləri almaq mümkündür. Lakin alış-veriş etmək üçün ilk növbədə hərracda iştirak etmək lazımdır. Bu hərraclarda iştirak etmək üçün Dubayda qeydiyyatdan keçmək və müəyyən sənədləri təqdim etmək lazımdır. Bundan əlavə, avtomobillərin uzun müddət açıq havada saxlandığını nəzərə alsaq, satın almadan əvvəl ətraflı qiymətləndirmənin aparılması vacibdir. Əks halda ciddi təmir xərcləri ilə qarşılaşmaq mümkündür.
Dubayda hava limanının dayanacağında dayansanız, çox güman ki, toz içində bir neçə lüks avtomobil görəcəksiniz.
 

Ticarət mərkəzlərinin ətrafında, mağazaların qarşısında və ya bəzi yaşayış məntəqələrində də bu avtomobillərə rast gəlmək mümkündür. Dubay qanunlarına görə, avtomobil hərəkətə mane olmadığı müddətcə eyni yerdə uzun müddət qala bilər. Buna görə də bəzi avtomobillər yerindən tərpənmədən bir ilə qədər çürüyə bilər.
 

Hərraclarda normal dəyəri milyonlarla dirhəm olan avtomobillər çox ucuz qiymətə satılır. Arzu edənlər bu auksionlarda iştirak edərək sərfəli qiymətə “Ferrari” və ya “BMW” kimi dəbdəbəli avtomobillər ala bilərlər.

Aynil