Mask Ağ Evdə az görünür - "İşini tədricən başa çatdırır"

İlon Mask Ağ Evdəki fəal iştirakını mərhələli şəkildə dayandırır.

Sfera.az xəbər verir ki, "New York Post"un yaydığı məlumata görə, Mask artıq Ağ Evə mütəmadi gəlmir. 

Ağ Evin Baş Katibi Syuzi Vails bu barədə bildirib: “Artıq onunla üz-üzə yox, telefon vasitəsilə əlaqə saxlayırıq”.

Mask Trampın vəzifəyə qayıtdığı ilk 100 gün ərzində siyasət və büdcə qərarlarında mühüm rol oynamışdı. Lakin o, son həftələrdə Hökumət Effektivliyi Departamentindəki (DOGE) vəzifəsindən də tədricən uzaqlaşmağa başlayıb. Onun rəsmi vəzifə müddəti may ayının sonunda başa çatacaq. Həmin vaxta qədər Maskın komandası Ağ Ev kampusunda yerləşən Ayzenhauer İcra Binasında fəaliyyətini davam etdirəcək.

Ötən həftə "Tesla"nın maliyyə hesabatı konfransında çıxış edən İlon Mask, may ayından etibarən əsas diqqətini yenidən "Tesla"ya yönəldəcəyini bildirib. Bununla yanaşı, hökumətlə bağlı bəzi məsələlərdə həftədə bir-iki gün töhfə verməyə hazır olduğunu qeyd edib: “DOGE-in əsas strukturunu artıq qurmuşuq. Əgər faydalı ola bilərəmsə, dəstək verməyə davam edəcəyəm”.

Bəsti Rəfizadə
Sfera.az