ABŞ Prezidenti Donald Tramp Ukrayna-Rusiya müharibəsi ilə bağlı verdiyi açıqlamalarla beynəlxalq gündəmdə səs-küyə səbəb olub.

Sfera.az “Reuters” nəşrinə istinadən xəbər verir ki, Ağ Evdə keçirdiyi mətbuat konfransında Tramp müharibənin məsuliyyətini Ukraynanın NATO-ya üzvlük cəhdinə bağlayaraq, Krımın Rusiyanın nəzarətində qalmalı olduğunu müdafiə edib.

Tramp iddia edib ki, Ukrayna Prezidenti Volodimir Zelenski də Krımın Rusiyada qalacağını anlayır və bu mövqe ABŞ tərəfindən təklif olunan sülh planında da əksini tapır.

Tramp administrasiyasının hazırladığı sülh planı Ukrayna-Rusiya müharibəsinə son qoymağı hədəfləyir. Plana əsasən, Ukrayna NATO-ya üzvlük məqsədindən əl çəkəcək, lakin Avropa İttifaqına üzvlük istiqamətində fəaliyyətini davam etdirə biləcək.

Bundan əlavə, ABŞ Krımı rəsmi olaraq Rusiya ərazisi kimi tanımağı və işğal olunmuş digər Ukrayna ərazilərinin də faktiki olaraq Rusiyanın nəzarətində saxlanmasını təklif edir. Əgər plan həyata keçərsə, Ukrayna ərazisinin təxminən 20 faizi Rusiya nəzarətində qalacaq. Sülh planına Ukrayna gəmilərinin Dnepr çayından sərbəst istifadə etməsi və 2014-cü ildən Rusiyaya qarşı tətbiq olunmuş sanksiyaların ləğvi də daxildir. Tramp bu addımları Rusiyanın müharibəni bitirmək və Ukraynanın tamamını ələ keçirmək iddiasından imtinası kimi qiymətləndirib.

Trampın açıqlamaları və ABŞ-nin təklif etdiyi sülh planı Avropa dövlətləri və Ukrayna tərəfindən ciddi narazılıqla qarşılanıb. Tənqidçilər planın Ukraynanın ərazi bütövlüyünə zidd olduğunu və Rusiyanın hərbi təcavüzünü legitimləşdirdiyini bildirirlər.

Prezident Tramp isə sülh danışıqlarında “böyük güzəştlər” əldə edildiyini və müharibəyə son qoymaq üçün real imkanların yarandığını vurğulayıb.

Fidan Hacızadə

Tramp: "Krım Rusiyada qalmalıdır"