Məşhur Tiktoker həbs edildi
Aprelin 21-də Myanmada güclü zəlzələ olacağını proqnozlaşdıran astroloq Con Moe The saxlanılıb.
Sfera.az “BBC”ə istinadən xəbər verir ki, astroloq bu proqnozunu aprelin 9-da sosial şəbəkələrdə paylaşıb və video qısa zamanda viral olaraq 3 milyondan çox baxış toplayıb.
Myanma İnformasiya Nazirliyi açıqlamasında bildirir ki, Con Moe The ictimaiyyət arasında çaxnaşma yaratmaq məqsədi ilə yalan ifadələr vermək ittihamı ilə həbs edilib. “TikTok” paylaşımında o, aprelin 21-də ölkədə baş verəcək zəlzələnin bütün şəhərləri vuracağını iddia etmiş, insanlara zəlzələ zamanı vacib əşyaları ilə birlikdə evlərini tərk etməyi və hündürmərtəbəli binalardan uzaq durmağı tövsiyə etmişdi.
Yanqon şəhərində yaşayan bir sakin AFP xəbər agentliyinə bildirib ki, qonşuluqdakı bir çox insan astroloqun dediklərinə inanıb və həmin gün evlərinə daxil olmayaraq çöldə gecələyiblər.
Con Moe The özünü astroloq kimi təqdim edir və proqnozlarını astrologiya və əl falına əsaslanaraq verdiyini bildirib. Onun “TikTok” hesabının 300 mindən çox izləyicisi var idi, lakin hazırda hesab artıq əlçatan deyil.
Qeyd edək ki, iki həftə əvvəl martın 28-də Myanmada 7.7 bal gücündə baş verən zəlzələ nəticəsində 3500-dən çox insan həyatını itirmişdi. Zəlzələnin təsirləri Mandalay və Saqainq bölgələrində xüsusilə hiss olunmuş, Taylandın paytaxtı Banqkokda da titrəyişlər qeydə alınmışdı. Bir tikinti obyektinin uçması nəticəsində onlarla insan həlak olmuşdu.
Mütəxəssislər bildirirlər ki, zəlzələlərin əvvəlcədən proqnozlaşdırılması mümkün deyil və bu tip paylaşımlar cəmiyyətdə əsassız qorxu və panika yarada bilər.
Fidan Hacızadə
