Ən çox kitab oxucusu bu ölkədədir

BMT-nin Təhsil, Elm və Mədəniyyət Təşkilatı (UNESCO) tərəfindən hər il 23 aprel tarixi “Ümumdünya Kitab və Müəllif Hüquqları Günü” kimi qeyd olunur.

Sfera.az xarici mediaya istinadən xəbər verir ki, bu tarix Uilyam Şekspir və Migel de Servantesin ölüm tarixi ilə üst-üstə düşdüyü üçün dünya ədəbiyyatında simvolik əhəmiyyət daşıyır. Bu gün münasibətilə dünyanın müxtəlif ölkələrində kitabsevərlərin mütaliəyə həvəsləndirilməsi məqsədilə tədbirlər keçirilir.

“World Population Review” və “CEO World Magazine” məlumatlarına əsasən, 2024-cü ildə dünyada ən çox kitab oxunan ölkə ABŞ olub. Vaşinqtonda hər bir insan orta hesabla ildə 357 saat kitab oxuyur ki, bu da təxminən 17 kitab edir. Siyahının ikinci pilləsində Hindistan yer alır. Burada adam başına kitab oxumağa sərf olunan vaxt 352 saatdır. Üçüncü yerdə isə 343 saatla İngiltərədir.

Fransa, İtaliya, Kanada, Rusiya, Avstraliya, İspaniya, Hollandiya və İsveçrə sırada sonrakı yerləri alır. Ən az kitab oxunan ölkələr sırasında isə Əfqanıstan, Bruney, Pakistan, Səudiyyə Ərəbistanı və Birləşmiş Ərəb Əmirlikləri yer alır. Əfqanıstanda adambaşına ildə orta hesabla cəmi 3 kitab oxunur.

Texnologiyanın inkişafına baxmayaraq, ABŞ və Hindistan kimi ölkələrdə hələ də çap olunmuş kitablara üstünlük verilir. 2024-cü ildə ABŞ-də 780 milyondan çox kitab satılıb. Elektron və audio kitablar bazarda yerini qorusa da, satış baxımından çap məhsullarından geri qalır. Amerika Naşirlər Assosiasiyasının məlumatına əsasən, bu ilin ilk rübündə elektron kitab satışlarından təxminən 250 milyon dollar gəlir əldə edilib. Eyni dövrdə çap kitablarının gəliri isə 3 milyard dollara yaxınlaşıb.

Dünya üzrə bütün dövrlərin ən çox oxunan kitabları sırasında Quran və İncil ilk sıralarda gəlir. XXI əsrdə isə J.K. Rowling-in “Harry Potter” seriyası və J.R.R. Tolkien-in “Üzüklərin Hökmdarı” əsəri ən populyar kitablar arasında yer alır.

Bundan başqa, dünya ədəbiyyatının klassik nümunələri Migel de Servantesin “Don Kixot”u, Çarlz Dikkensin “İki şəhərin nağılı”, Antuan de Sent-Ekzüperinin “Balaca şahzadə”si, Viktor Hüqonun “Səfillər”i və Fyodor Dostoyevskinin “Cinayət və cəza”sı da hələ də geniş oxucu auditoriyasına malikdir. Çin lideri Mao Tszedunun fikirlərindən ibarət “Sədr Maonun seçilmiş kəlamları” da ən çox oxunan nəşrlər sırasındadır.

Fidan Hacızadə