Dünyada internet kəsilə bilər - Xəbərdarlıq

Avropanın aparıcı telekommunikasiya şirkətləri, son dövrlərdə sualtı internet kabellərinə qarşı artan sabotaj aktları ilə bağlı ciddi xəbərdarlıq ediblər. Onlar bu hücumların yalnız Avropanı deyil, bütün dünya üzrə internet infrastrukturunu və həyati vacib xidmətləri təhlükə altına sala biləcəyini bildiriblər. 

Sfera.az "CNN Türk"ə istinadən xəbər verir ki, şirkətlərin NATO və digər beynəlxalq hərbi qurumlara ünvanladıqları açıq məktubda, xüsusilə Baltik və Şimal dənizində yerləşən sualtı kabellərə qarşı hibrid təhdidlərin artdığı vurğulanıb.

Mütəxəssislər bu infrastrukturların qorunması üçün qabaqcıl texnologiyalara sərmayə qoyulması və kəşfiyyat məlumatlarının paylaşımının gücləndirilməsinin vacibliyini qeyd ediblər.

Məktubda konkret ölkənin adı çəkilməsə də, iddialara görə bu sabotajların arxasında Rusiyanın ola biləcəyi ehtimal edilib. Qeyd olunur ki, 2024-cü ilin noyabrında Baltik dənizində Çin gəmisinin fiberoptik kabelə zərər vurduğu və həmin gəminin Rusiya mallarını daşıdığı müəyyən edilmişdi.

Telekommunikasiya şirkətləri bildiriblər ki, bu cür hücumlar nəticəsində qlobal internet bağlantısı, enerji infrastrukturu, maliyyə əməliyyatları və beynəlxalq rabitə ciddi şəkildə zərər görə bilər.

Mütəxəssislər beynəlxalq ictimaiyyəti bu təhlükəyə qarşı birgə tədbirlər görməyə çağırırlar.

Bəsti Rəfizadə