Fransa və Misir arasında saziş imzalandı
Fransa Prezidenti Emmanuel Makron və Misir Prezidenti Əbdülfəttah əs-Sisi Qahirədə yerləşən “İttihadiyyə” sarayında keçirilən mərasimdə iki ölkə arasında “Strateji Tərəfdaşlıq Sazişi” imzalayıblar.
Sfera.az xarici mediaya istinadən xəbər verir ki, sazişin imzalanmasından sonra liderlər birgə mətbuat konfransı keçiriblər.
Prezident Sisi bəyan edib ki, Qahirə ilə Paris arasında münasibətlər artıq strateji tərəfdaşlıq səviyyəsinə yüksəlib. O, Makronla birlikdə Qəzzada atəşkəsə dönməyin zəruriliyini vurğuladıqlarını və fələstinlilərin öz torpaqlarından zorla köçürülməsinə qarşı olduqlarını bildirib.
“Fələstin məsələsində ədalətli həll tapılmadıqca, Yaxın Şərqdə sülh və sabitlik yalnız bir arzu olaraq qalacaq”,– Sisi qeyd edib.
Misir prezidenti həmçinin Qəzzada atəşkəs əldə edildikdən sonra bölgənin yenidən qurulması məqsədilə Qahirədə beynəlxalq konfrans keçirmək niyyətində olduqlarını açıqlayıb. Fransa Prezidenti Makron isə Misiri “tarixi və strateji tərəfdaş” adlandıraraq, bu ölkədə olmaqdan məmnunluğunu ifadə edib. O bildirib ki, Fransa Misirin regional və milli sabitlik yolundakı səylərini dəstəkləyir və imzalanan saziş iki ölkə arasında mövcud olan güclü əlaqələrin sübutudur.
Fidan Hacızadə
