ABŞ Prezidenti Donald Tramp Çin mənşəli TikTok sosial media platformasının ABŞ-lı bir şirkətə satılması üçün yeni təklif irəli sürüb. O, Pekin rəhbərliyinin bu satışa razılıq verməsi halında Çin üçün tarif endirimləri tətbiq edə biləcəyini bildirib.

Sfera.az Türkiyə mediasına istinadən xəbər verir ki, Tramp Oval Ofisdə jurnalistlərin suallarını cavablandırarkən TikTok-un ABŞ-lı bir şirkət tərəfindən satın alınmasına dair razılıq əldə olunmazsa, tətbiqə qoyulan vaxt məhdudiyyətini uzada biləcəyini qeyd edib. “TikTok-u almağın bir çox yolu var. Biz öz ölkəmiz üçün ən yaxşı yolu seçəcəyik” – deyə o bildirib.

Prezident həmçinin qeyd edib ki, Çinin bu satışa razılıq verməsi lazım ola bilər və bunun üçün müəyyən güzəştlər edilə bilər. “Düşünürəm ki, onlar razılaşacaqlar. Onları razı salmaq üçün tariflərdə kiçik endirimlər edə bilərəm və ya başqa bir addım ata bilərəm” – deyə o vurğulayıb.

Tramp tariflərin TikTok-dan daha dəyərli olduğunu və bu məsələdə müəyyən güzəştlərin mümkün olduğunu qeyd edib. O, prezidentlik dönəminin ilk günündə TikTok-un bir ABŞ şirkətinə satılmaması halında ölkədə tamamilə qadağan olunmasını nəzərdə tutan qərarı 75 gün müddətinə təxirə salmışdı.

ABŞ Prezidenti TikTok-un tamamilə qadağan olunmasının tərəfdarı olmadığını, lakin qadağanın aradan qaldırılması üçün platformanın 50%-nin ABŞ-lı bir şirkətə satılmalı olduğunu vurğulayıb. “TikTok barədə ya satmaq, ya da bağlamaq hüququmuz var. Buna biz qərar verəcəyik. Çinin də təsdiqi lazımdır, amma əminəm ki, onlar da razılaşacaqlar. Əgər razılaşmazlarsa, Çin üçün tariflər tətbiq edəcəyik” – deyə Tramp bildirib.

Digər tərəfdən, Tramp administrasiyası məşhur sosial şəbəkə platformasının bağlanmasının qarşısını almaq üçün qərarın əsas səbəbi olan məlumat təhlükəsizliyi problemlərinə həll tapmalıdır.

Xatırladaq ki, TikTok-un çətir şirkəti ByteDance Çində qeydiyyatdan keçmiş bir şirkətdir və Çin qanunlarına görə istifadəçi məlumatlarını hökumətlə paylaşmaq öhdəliyi var.

Bəsti Rəfizadə

Trampdan Çinə yeni TikTok təklifi